Lider di fraccion di MEP, Rocco Tjon a reacciona riba e peticion cu fraccion di oposicion di AVP a haci riba CAft su ultimo conseho pa atende e reunion publico di ayera, tocante presupuesto 2019.

El a bisa cu a base di cifra real cu e organo legislativo aki a obtene di cada ministerio y post riba kico ta wordo gasta, nan por realisa nan trabou di control debidamente. Tjon ta haya cu no mester di e Colegio di Supervision Financiero CAft so pa bin bisa con e cosnan ta bay. Sino como Parlamentario, nan mester tuma nan trabou na serio pa por lesa e documentonan disponibel pa wak si gobierno ta ehecutando nan trabou manera mester ta.

Pa loke ta e conseho cu e Colegio di Supervision Financiero CAft ta dunando riba desaroyo di presupuesto di Aruba, Tjon a indica cu nan tin nan temporada pa duna esaki. El a declara cu e mesun cos cu a sosode biaha pasa, ora cu nan a controla gobierno riba su entradanan y gastonan, parlamento a ricibi un reportahe financiero. E ta considera e reunion publico di control di gobierno riba presupuesto 2019 como uno hopi importante, cu mester tuma luga debidamente.

E ta un forma di control extra cu nan por a haci posibel pa medio di un mocion.

Den dje nan por a wak, a base di cifranan cu ta wordo compila pa medio di Departamento di Finansa, con pais Aruba ta para pa loke ta ehecucion di presupuesto 2019. Pero adicional di esaki, mescos cu biaha pasa, Parlamento ta haya a base di nan ‘uitputtings cijfer’.

Riba e cuestionamento cu fraccion di oposicion a haci riba e falta di documentonan completo –entre nan esun di CAft – pa controla con e presupuesto ta bayendo, Tjon ta remarca cu e tipo di control cu nan ta haciendo ta a base di un mocion cu mayoria di Parlamento a aproba y cu no a conta cu sosten di oposicion.

“Pasobra esaki ta un mecanismo di control extra,” el a bisa. Banda di otro mecanismo, manera tur e reportahenan cu CAft ta trece pa dilanti tambe. E ta haya cu e diferencia ta cu a base solamente di un rapport di CAft nan tin cu haci cambio riba presupuesto. Sino a base di e reunion publico, Parlamento si por haci esey pa medio di mocionnan pa urgi gobierno te hasta pa re aloca fondo.

 

LEAVE A REPLY

Please enter your comment!
Please enter your name here