Entrante awe, 1 di februari, un ley nobo lo pasa na vigor caminda cu e prijsnan di Arubus, hunto cu esunnan di tur e autobusnan, lo bira 3 florin como tarifa general. Esaki sigur lo yuda den nan fondo pa garantisa un bon servicio pe comunidad.
Vocero di Arubus, Sanin Daou a splica cu Arubus semper ta depende di prijsnan cu nan ta haya for di gobierno. E tarifa aki a wordo pasa den Parlamento y ta aplicabel tanto pa e busnan di Arubus como e autobusnan y esaki a wordo delinea na 3 florin. E ora ey Arubus automaticamente mester cuminsa cobra 3 florin pa trip. Ta haci esey riba e smartcard di Arubus, Daou a splica. Tur hende cu tin smartcard blauw, cu ta e standard, tin e tarifa e ora 3 florin pa trip y esun di scol, cu tabata 1.25, ta bay bira awo 1.50. Esey tambe ta un cambio chikito cu a bin cun’e. A base di esey ta haci’e manera cu a wordo duna. Ta algo cu Arubus a haya y adapta. Arubus no ta esun cu por dicidi den casonan asina ey, segun Daou.
Tarifa cash tambe a subi
Loke si kier pa tur hende sa ta cu e tarifa cash tambe a subi. E tabata 4 florin y awo el a bira 4.50. P’esey ta curasha tur hende pa uza e smartcart, pasobra uzando e smartcard, bo ta haya esey na 3 florin.
Arubus kier recorda tur hende cu nan a saca un Advantage Card un tiki tempo pasa y e Advantage Card ta keda na vigor. Kier a recorda tur hende, cu por probecha inmensamente di rebaho. Si tur hende ta corda ainda si tini un Advantage Card por deposita. Prome tabata 2 suma, cu tabata ta di 195 florin pa haya 100 trip. Tabata esun di 100 florin cu ta haya 50 trip. Despues a haya esun cu ta deposita di 50 florin ta haya 25 trip. Esaki ta keda na vigor. Kiermen cu si busca un Advantage Card y deposita 195 florin, ta haya 100 trip, esaki ta nifica cu ta paga 1,95 pa cada trip.
Mescos cu si deposita 100 florin, ta haya 50 trip. E ora ta haya e tarifa di 2 florin pa cada trip. Mescos cu deposita 50 florin, bo ta haya 25 trip, na 2 florin. Den tur e casonan aki por spaar masha hopi mes, uzando un Advantage Card. Manera cu a programa, Advantage Card por hay’e por nada na Arubus y esey ta di bo.
Unico cos cu tin cu corda ta cu solamente e ta valido pa 35 dia. Kiermen cu si deposita 195 florin, e ta conta pa 35 dia. E ora tin cu uza e 100 tripnan ey den 35 dia. Si deposita prome cu 35 dia, e tripnan prome lo rollover sigui den siguiente luna. Si no deposita nada dentro di 35 dia y no uza nan, e ora ta e unico ora cu lo perde loke tin ainda riba dje. Mirando e bentaha y mirando cuanto ta spaar, segun Daou, ta na su luga y ta cumbini tur hende pa busca un Advantage Card. Arubus kier pa tur hende sa cu e t’ey ainda y pa probecha di esaki Daou, a splica.
.jpg "Philipine van Aanholt 26 luga prome dia Laser Radial Weganan Olimpico")
