Regularmente, den e dianan aki tambe, nos ta haya un cantidad di muestra di bon intencion relaciona cu e metanan di desaroyo sostenible (SDG) di Nacionnan Uni pa aƱa 2030. Pa cuminza cu e parti positivo: ta bon cu ta dedica atencion na esaki, ya cu nan ta un guia y estimulo pa nos desaroyo en general den e decada aki. Y e 17 metanan formula ta cubri hunto practicamente tur area importante di cualkier sociedad, di nos tambe.

Sin embargo, e intencion no ta cu e metanan ta sirbi como un tipo di alabanza, unda ta duna testimonio di nos compromiso cu e metanan, sin cambia nada y keda ripiti nan te 2030. E mester ta un ā€˜roadmapā€™, no un ā€˜roadshowā€™. Y nos ta mira demasiado poco avance den loke nos no mester aspira so, sino mester cumpli tambe.

Y ta aki nos ta haya falta di claridad ta den ki direccion nos ta desea di hiba e comunidad aki. Naturalmente den esey mayoria di hende ta enfoca mesora riba gobierno. Esey tin cierto logica, gobierno ta e guia y actor principal den nos comunidad den tur asunto y aspecto, di manera cu finalmente tur cos ta bin hunto den maneho gubernamental.

Pero, esey no ta bisa cu necesariamente tur cos mester cuminza y termina cerca gobierno. Y ta aki cu nos por sinti un punto debil. Nos no ta mira cu e temanan ta biba di berdad cerca e partinan interesa di cada tema. Y esey ta un obstaculo grandi pasobra finalmente ta gobierno lo mester tuma iniciativa riba cada tereno, pa despues haya e critica cu nan ta usurpa tur cos… No cu nos kier bisa cu esey ta e caso semper, pero e mihor manera pa evita e critica cu ta gobierno ta impone, ta pa cuminza traha riba cada un di e metanan, pero for di punto di salida di e gruponan cu tin un interes genuino. Y e siete aƱa apenas cu ta separa nos di yega na 2030, pa cierto areanan ya a bira cortico.

Nos por tuma como ehemplo e sector di enseƱanza. Nos ta para dilanti retonan grandi den loke nos mester logra aki, mientras cu nos por ta consciente di e hecho cu e ruta pa 2030 ta cortico pa loke mester haci. Esey mester ta un estimulo pa cuminza mas pronto posible. No ta pornada den e esfuerzonan Hulandes nan ta pone hopi enfasis riba e area aki, pasobra e no ta solamente importante a corto plazo, sino cu e ta tuma mas di un decada pa finalmente mira e frutonan di e inversionnan cu mester. Pero kico nos ta mira? Cu e sector mes ta demasiado enfoca riba e lucha sindical pa mehoracion di condicion personal di e empleado den e sector, pero practicamente nunca nan mes ta acopla esey na e lucha pa mehoracion di contenido di e enseƱanza cu nan ta haya nan mes ta brinda, mientras nan sa mihor cu cualkier persona cu no ta di e sector kico ta e obstaculonan cu mester supera. Ta warda te ora e Hulandesnan bin pa bisa nos kico falta, y e ora tin ta coopera di curazon, pero otronan ta keda para un banda, cu escepticismo y/o critica, pero no ta saca un dede…

Y esaki mientras e situacion den e sector, den sentido di loke nos ta entrega finalmente na calidad, ta simplemente tristo. Pa bisa e cos den un par di palabra: nos sistema frustra y frustrante no ta produci loke nos comunidad mester, ni den sentido economico, ni social. Den e dianan aki atrobe, entre otro durante e encuentro entre parlamentario na Hulanda, lo ta papiando di e asunto aki. Y nos tin sigur cu por bin un par di punto dilanti cu ta berdadero y problematico, pero nos mester ta caba den e fase di actuacion, di ehecucion di un plan cu ta duna perspectiva di mehoracion. Nos tin esey? Nos ta eynan caba? E contesta ta simple: No. Y como agravante nos por bisa acerca cu por lo pronto nos no ta yega na esey tampoco, y cu e 7 aƱa te 2030 no ta suficiente pa un plan realistico, asina ta cu realmente den termino di planificacion, ya nos mester ta contempla e aƱanan despues di 2030 pa nos tin un persepctiva factible pa ehecucion di un plan cu ta atende e problemanan cu tin. Nos no ta bay menciona tur, pero djis como ehemplo: nos mester bay mehora e base, cu ta enseƱanza basico, unda no ta trata solamente di dicidi ta ki idioma ta maneha, sino cu e manera di duna les ta asina anticua cu el a perde contacto cu realidad, e realidad di con den e mundo desaroya aki mester maneha educacion. Esaki ta encera un trayecto di mas di un decada pa entrena e personal actual, y esunnan aspirante, segun un metodo totalmente diferente. Pregunta clave: con bo ta bay logra motiva hende pa esaki, si henter ora ainda problema den enseƱanza ta tocante placa, no pa drecha scol, sino salario so…?

Di e mesun manera aki, nos por trata e demas 16 metanan di desaroyo, y cada vez nos ta bolbe na e punto, cu nos no ni sa ainda den ki direccion nos ta bay. Punto positivo sin embargo: nos tin hopi hende di experiencia, cu ta bon den roadmap, pero no kier tende di roadshow…

LEAVE A REPLY

Please enter your comment!
Please enter your name here