Segun trahado social y coordinador di fundacion Famia Planea Aruba, Jonathan Trinidad, den transcurso di e ultimo añanan, nan ta mirando un comunidad cu ta birando mas consciente di nan salud sexual reproductivo.

Educacion sexual ta un di e tarea primordial cu fundacion Famia Planea Aruba tin den nos comunidad. Pero tambe percura pa un salud sexual reproductivo responsabel, cu ta e parti di prevencion. Sinembargo e pregunta cu ta surgi ta: Con nos comunidad ta para cu e salud sexual reproductivo? Ya cu hopi ta wordo papia di salud fisico, mental y emocional, pero e parti sexual, masha poco mes, como cu ainda ta existi un taboe pa trata e topico aki.

Trinidad a laga sa cu nan por a mira -principalmente den e ultimo añanan- un cambio positivo riba salud sexual reproductivo na Aruba. Esaki ta wordo refleha den e cifranan cu nan tin riba uzo di proteccion of anticonceptivo. Pero, tambe pa loke ta trata crecemento di clientela, particularmente di nos poblacion hoben.

Na 2018 fundacion Famia Planea Aruba a conoce un crecemento di 40% den nan clientela. Pero, di e cifra porcentual aki, un 25% tabata hoben. Si nan ta conta for di 5 aña pasa te awe, nan ta wak cu constantemente e ta varia entre 22% cu 30% di crecemento entre clientenan hoben nobo.

Tambe nan ta mira e crecemento den educacion sexual. Na 2018 nan a registra un crecemento di 25% di charla cu nan a duna na scolnan. Esaki ta encera 5.250 muchanan y hobennan cu a haya minimo un presentacion of charla for di nan.

Un investigacion realisa pa e fundacion aki a mustra cu 70% di nan clientela cu ta bishita nan localidad na Oranjestad, ta hobennan cu a haya presentacion for di nan. P’esey nan ta purba di reenforsa e informacion cu nan a yega di duna den e scolnan. Pero tambe nan ta realisa campaña manera ‘I Love My Body’, cu ta uno hopi popular y exitoso, igualmente e campaña ‘Ami ta dicidi’.

 

Segun Trinidad, tur esakinan ta un indicacion cu hobennan ta birando consciente di nan salud sexual reproductivo. Y na final, nan ta tuma e decision responsabel pa no solamente proteha nan curpa, pero tambe pa nan tin nan propio salud sexual den nan man.

E concepto di salud sexual cu e fundacion Famia Planea Aruba ta para p’e, y cu ta hancra den Organisacion Mundial di Salud (WHO), ta uno caminda ‘salud sexual ta un estado di bienestar, no solamente fisico, sino mental y social relaciona cu sexualidad’.

Den tur esaki –segun Trinidad– tin un concepto positivo entre otro pa duna respet na e curpa, y tambe e ta ahusta na bo norma y balor. Igualmente na limitacion cu bo mes ta pone como persona relaciona cu sexualidad. Como ehempel, el a bisa cu ‘si mi ta un hende cu mi manera di stima ta un sunchi riba mi cachete, bo tin cu respeta esey…’ Tur esaki, sin niun tipo di discriminacion, forsamento, desigualdad of comparacion.

 

LEAVE A REPLY

Please enter your comment!
Please enter your name here