Tin dos solicitud di referendum cu ta canando cerca Departamento di Mediador di Gobierno. Tur dos solicita pa sindicato FTA pa e trahadonan di Triple A (aeropuerto) y di Alhambra Casino. Esun ultimo actualmente e partidonan ta deliberando riba dje.

Anselmo Pontilius den su funcion di Mediador di Gobierno a informa na Bon Dia Aruba cu a sostene un reunion diahuebs ultimo cu FTA y diabierna cu gerencia di Triple A pa atende cu e referendum aki.

Ya caba e prome 14 dia a transcuri, caminda ariba papel FTA a demostra cu FTA por participa den e referendum, debi cu nan a mustra un mayoria di firma di trahadonan preto riba blanco. Dialuna ultimo cu Pontilius a duna e declaracion aki, e tabata repasando e lista di tur e trahadonan cu FTA a entrega pa garantisa cu tur cos ta cla.

Mediador di Gobierno a bisa cu te ainda nan no a ricibi e solicitud di otro sindicato pa participa den e referendum aki. Actualmente sindicato STA ta representa e trahadonan na aeropuerto pa hopi aña.

“FTA a pidi e referendum, pero di STA mes nos no a haya niun carta oficial cu ta pidi pa nan participa den e referendum”, el a declara. Den e caso aki, te ainda FTA ta participa su so den e referendum.

Pontilius ta den e proceso pa bay publica e segundo parti di e realisacion di e referendum aki. Aworaki nan ta fihando fecha cu ta pa fin di luna aki, unda nan lo percura pa e fecha, orario y sitio ta wordo anuncia manera ley ta prescribi. Mester transcuri un periodo di 14 dia pa e referendum aki por tuma luga.

 

LEAVE A REPLY

Please enter your comment!
Please enter your name here