Minister di Finanzas y Asunto Economico, Xiomara Maduro a bay mas den detaya riba e bishita y presentacion di embahador nobo di Reino Hulandes na Colombia, Ernst Noorman y tambe con esaki lo por contribui pa fortalece e laso comercial cu e pais bisiña aki. Pero tambe e cooperacion bilateral entre otro riba tereno di husticia y cultura.

El a bisa cu e tabata un bishita den cuadro di siña conoce otro y sa e ora eynan, kico ta e interes comparti y con embahada Hulandes por yuda Aruba y otro paisnan di Reino. E ta e forma cu nan por yega na e contactonan necesario na Colombia. Pero e pais aki di nan banda, con tambe nan por yega na e contacto cu nos pais.

E mandatario a referi cu e relacion entre ambos pais tanto familiar como comercial, cultural, etc… ta data for di hopi aña atras. Pero tambe pa loke ta trata e facilidad medico pa medio di AZV cu ta manda pashentnan pa Colombia.

“Tin hopi topico di cual Aruba formando parti di Reino cu ta bon pa embahador ta consciente di kico nos ta haci,” el a declara.

E mandatario a referi na productonan manera carni caminda pa hopi aña caba Aruba ta explorando e posibilidad di por cumpra carni for di Colombia. Tin un exigencia di parti di Aruba pa importa carni. E tin di haci cu e aprobacion of keuring pa e carni por drenta Aruba. Den e caso aki minister di sector primario, Chris Romero tabata presente.

Tambe minister di Husticia, Andin Bikker a asisti den e reunion aki cu embahador Noorman siman pasa, caminda e mandatario local a papia riba e parti di cooperacion hudicial entre ambos pais. Un par di aña pasa, Procurador General na Aruba hunto cu Procuraduria General na Colombia a yega di cera un convenio di intercambio di informacion. Esey tambe ta un topico cu a bini dilanti.

Minister Maduro a referi riba e parti comercial, caminda nan a papia riba e mision di reino cu tabatin na november 2019 den cual Aruba tambe tabata presente. E biaha ey, Aruba a haci uzo di oportunidad pa acerca algun comerciante potencial pa mustra nan, e seis sectornan prometedor pa diversificacion di Aruba su economia. E ta un forma pa nan tin un bista di kico Aruba ta trahando ariba dje y den cual nos pais ta buscando inversionistanan.

E parti cultural a haya su atencion den e reunion aki. E mandatario bistiendo su pechi di cultura a bisa cu e delegacion diplomatico aki a reuni cu Stichting Rancho cu ta percura pa fortalece e lasonan comercial cu tabatin semper entre Aruba y Guajira. Tambe el a referi cu Museo Arkeologico di Aruba (MANA) tin un ‘canoa’ of barco indjan ciu ta un ehempel tangibel di e relacion mercantil cu semper tabatin entre Aruba y Colombia.

 

LEAVE A REPLY

Please enter your comment!
Please enter your name here