Minister di Finanzas y Asunto Economico, Xiomara Maduro a declara na Bon Dia Aruba cu gobierno lo tene cuenta cu e kerntakenanalyse ultimo cu SER a traha na 2008.

E mandatario a bisa cu semper cu bo ta haci e tipo di cambio den gobernacion, claramente sea cu nan ta pidi un rapport di SER. “Of si tin un rapport caba cu nan a traha ariba nan mes, e ta wordo teni na consideracion.”

Un punto di atencion importante den e analisis aki di SER ta cual ta e trabao y servicionan cu Gobierno mes mester por haci of cual di nan lo por transferi of delega pa e sector priva haci’e. SER ta reconoce cu ta un decision politico pa determina kico ta un tarea of servicio publico. Sinembargo e ultimo kerntakenanalyse a keda traha mas cu 10 aña pasa, y te ainda ningun mandatario ni gobierno a ehecut’e.

Minister Maduro a bisa cu gobierno di Aruba su dos gasto mas grandi ta: gasto di pago di interes riba debe nacional y gasto di personal den aparato publico. Mirando cu esaki ta e dos gasto cu mas tin peso riba nos presupuesto nacional ta haci cu gobierno su prioridad ta dirigi riba dje, segun e mandatario.

E ta haya cu tin mas cos cu por wordo haci pa baha gasto di gobierno, entre nan cual ta e tareanan esencial di gobierno. Y cual ta e tareanan cu gobierno por laga over pa sector priva. “Pero nos mester a traha a base di prioridad,” el a bisa.

Un di e prioridad tabata ta pa haci di e debe uno manehabel y pagabel pa pais Aruba. E di dos luga pa atende cune tin di haci cu gasto di personal. Den e caso aki entre otro -segun e mandatario- nan a pidi asistencia di Fondo Monetario Internacional (IMF).

Tambe el a referi cu SER a skirbi un rapport, pero tabata asina cu gobierno mester a atende cu e dos gastonan grandi aki di un manera di mas prioridad. Esta prome cu nan lo sigui bay cu tur e otro gastonan den gobernacion cu mester wordo controla, baha of haci nan di otro manera. Entre nan e posibilidad di por saca cierto tarea gubernamental y pone nan den man di sector priva.

LEAVE A REPLY

Please enter your comment!
Please enter your name here