Parlamentario Endy Croes a declara na Bon Dia Aruba cu encuanto control riba gasto di personal tin un protocol firma cu Hulanda, cu gobierno di Aruba no lo surpasa 479 miyon e aña aki. Sinembargo tin un discusion riba ehecucion y uzo di personal profesional pa atende cu e Social Crisis Plan pa un temporada di dos aña.

E disputa ta –segun e Parlamentario di e fraccion di MEP– cu Hulanda kier wak e gasto di personal di e Social Crisis Plan incorpora den e cifra di 479 miyon florin. Pero e ta haya cu ta cuestion di interpretacion di locual a wordo acorda den e protocol, ya cu e exigencia aki no ta para den e protocol firma y e ta algo separa, segun Croes. Pero esaki no ta kita cu nan ta sigui controla y presiona e gobierno pa nan gasto di personal inicialmente presupuesta no subi mas di loke a keda presupuesta. E gasto di personal di gobierno ta nifica alrededor di un 36% di e presupuesto. E presupuesto 2019 cu a wordo aproba ta alrededor di 1.4 biyon florin.

Actualmente Parlamento ta na spera di e reportahe di e cifranan di entradanan y gastonan di e prome seis luna di 2019. Otro siman nan ta spera di haya sa riba un fecha pa por trata e reportahe di e prome semester di e presupuesto 2019. Logicamente –segun Croes– unabes cu nan haya e reportahe di e presupuesto lo por haya por lo menos 6 pa 7 dia pa nan por studia e cifranan debidamente. Ainda ta keda dos siman di augustus pa bin cu e reunion publico pa ehecuta e mocion pa controla e presupuesto mita di aña y purba di logra cera cu un ‘budget neutral.’