Un grupo di sindicato di e sector publico a tene un reunion cu Parlamento. Nan a expone nan preocupacion riba e concepto di ley cu ta reduci salario di ambtenaar cu gobierno a entrega cerca nan, y cu pronto lo wordo trata den nos organo legislativo.

Segun presidente di Sindicato di Aduana di Aruba (SADA), Edward Maduro, nan deseo tabata cu den caso cu e concepto di ley aki cu ta afecta tur empleado publico ta wordo trata prome cu e parlamentario bay cu receso, pa nan no pasa e ley aki siendo cu ainda tin preocupacionnan cu no a wordo aclaria ainda di parti di gobierno.

Nan intencion no tabata pa bay den discusion cu e parlamentarionan, si e reduccion mester wordo haci paden of pafo di e salario. Pero e discusion tabata ta –segun sindicalista Maduro – pa sindicatonan trece nan preocupacion pa Parlamento no yega pasa e ley aki sin mas. Vooral sin importa kico e miembronan di e sindicato ta pensa riba dje.

 

E sindicato presente den e reunion aki diahuebs ultimo tabata: SADA, SEPPA, SIMAR y SPA. Den representacion di SADA a bay su presidente, Edward Maduro hunto cu secretaria di e sindicato, Aimee Tromp-Saladin, kende nan a trece cerca e comision central di Parlamento e preocupacion di e miembronan di e cuerpo aki. Esaki a tuma luga despues cu nan a yega di sostene un reunion cu gobierno algun dia prome.

Preocupacion

Maduro a declara na Bon Dia Aruba cu SADA hunto cu e otro sindicatonan a splica parlamento kico, pakico y dicon nan preocupacion t’ey relaciona cu cierto articulonan di e concepto di ley di gobierno. Nan ta tres articulo specifico di e ley aki: 3, 7 y 8.

E tabata un reunion importante, pasobra nan por scucha for di e miembronan di Parlamento cual ta nan punto di salida prome cu e concepto di ley lo wordo trata. E sindicalista ta haya cu na final di dia, ora e ley ta wordo trata, ta e 21 parlamentarionan ta esunnan cu ta bay vota pro of contra. Pero tambe nan por bin cu amienda of cambionan necesario den e ley aki. Den e reunion cu nan a tene cu Parlamento, e sindicatonan no a haya sa ainda riba fecha cu e ley aki lo wordo trata.

Maduro ta spera cu despues di e reunion aki e miembronan di e diferente fraccion por a duna oido na nan preocupacionnan pa asina nan por bin cu e cambionan necesario. Igualmente pa nan por bini cu e preguntanan pa e ministernan concerni durante e tratamento di e ley. Como SADA, e ta sinti cu e ambiente di e reunion tabata bon. El a bisa cu den e reunion nan a elabora cu e fraccionnan di coalicion di gobierno (MEP-POR-RED), entre otro riba e articulonan specifico cu tin e sindicatonan aki preocupa.

Un articulo cu nan a delibera hopi riba dje ta e articulo 3. E articulo aki ta papia di e porcentahe di e reduccion di salario, caminda e preocupacion ta si gobierno lo sigui baha for di e salario di e ambtenaar, manera nan a yega di hacie caba. Nan kier pa e reduccion por wordo haci pafo di nan salario pa asina no afecta nan pensioen den futuro.

Maduro a laga sa cu como sindicato nan a splica e parlamentarionan cu cada sindicato tin nan puntonan y pensamento conforme e deseo di nan miembronan. Ya cu como sindicato cada un di nan ta vocifera e preocupacion di nan miembro. No obstante esey –segun presidente di SADA – for di comienso caba y tambe prome cu e reunion aki caba, e parlamentarionan ta na haltura kico ta e pensamento di cada sindicato.

Presidente di SADA a sinti cu e parlamentarionan di coalicion di gobierno a bay mas den e direccion kico sindicatonan kier y kico nan no kier. Mientras cu e ta kere cu esaki no ta e discusion cu mester wordo hiba. Nan intencion como sindicato tabata pa nos organo legislativo por ta na haltura cu nan ta na mesa cu gobierno ainda pa locual ta trata dialogo. El a bisa cu e reunion ultimo cu nan a tene cu minister president ta e prome dialogo cu a tuma luga entre gobierno y sindicato riba asunto di reduccion di salario, y ainda nan no ta cla, segun Maduro.

LEAVE A REPLY

Please enter your comment!
Please enter your name here