Tin companianan cu a cuminsa mustra nan interes riba nos refineria y tankinan pa deposita combustibel na San Nicolas. Un di nan tin di haci cu un compania Mexicano cu segun publicacion den prensa no ta conta cu e reconocimento di e compania estatal di petroleo PeMex.

Prome Minister, Evelyn Wever-Croes a declara na Bon Dia Aruba cu e no por confirma esey. Loke e mandatario a bisa cu e sa ta loke a wordo poni den corant. El a informa cu a yega tambe di haya un carta den su oficina. Y el a por verifica cu esaki tambe a sali den medio di comunicacion. Pero e mes -segun e prome mandatario- no a wak e carta.

Pero si e persona cu a manda e carta mesora a wordo tuma contacto cune pa splik’e cu e tipo di carta aki e no por mand’e pa e bureau di e minister. Tambe nan a splik’e cual ta e camindanan cu e mester cana. E ta spera cu e hendenan interesa aki por a cana e caminda oficial pa cualkier interesado por bin na remarca den e destaho publico aki. E mandatario a bisa cu e interes di e hendenan aki ta mustra hopi interesante.

Igualmente el a declara cu definitivamente tin screening ta wordo haci pa e companianan interesa. Unabes cu dia 17 di juli yega, cu ta e culminacion di e periodo cu tur interesado por expresa nan interes, ta cuminsa un proceso. E tin di haber cu screening di e personanan envolvi den e destaho aki. Y si nan ta envolvi cu mas partido. tambe nan ta wordo screening. E otro caminda ta esun di evalua e proposicionnan cu nan a haci. Na final nan ta pone e dos factor aki hunto. Kiermen si nan tin un bon proposicion pero no ta pasa screening, e no ta bay door, segun e prome mandatario.

El a aclaria cu e mes no ta haci e tipo di screening aki. Pero si el a keda sorprendi cu e contenido di e articulo cu a keda publica rond di e asunto aki. Sinembargo el a dicidi di busca mas informacion caminda a bin resulta cu tin mas companianan cu a manda carta pa su ministerio.

Premier Wever-Croes a indica cu tin un persona apunta den su ministerio cu ta atende cu e asunto aki pa splica nan cual ta e caminda regular cu nan mester cana. “Pasobra nos no por haci’e pa nan,” el a bisa. Tur esaki segun procedura di notario pa e proceso bay full transparente, segun e prome mandatario.

 

 

 

LEAVE A REPLY

Please enter your comment!
Please enter your name here