Diahuebs atardi, e seleccion di landamento di Aruba Aquatics Federation a yega Aruba back for di Barbados, caminda nan a logra un total di 9 medaya: tres di oro, tres di plata y tres di brons, den e Carifta Swimming Championship.
Charissa Kock-Croes, tesorero di Aruba Aquatics Federation, a splica cu siman pasa 8 atleta a sali rumbo pa Barbados, pa e campeonato mas grandi den Caribe, Carifta Swimming Championship caminda tabatin cuater dia di competencia hopi intenso, pero cu hopi logro.
Desde e prome dia caba, Kock-Croes a indica, e seleccion a logra medayanan plata y despues ariba e otro dianan a logra scucha e himno di Aruba varios biaha. “Nos ta super orguyoso y contento cu nos atletanan. Tur dia Aruba a clasifica y mayoria di nan a clasifica y a logra bin cu medaya di brons, silver y oro”, el a señala.
Tyrine de Kort, un di e coachnan di e seleccion a splica cu Aruba a competi contra 18 otro team durante e campeonato aki y Aruba a logra sali na di 10 luga. El a agrega cu e e nivel di e campeonato aworaki despues di e pandemia a keda halto y el a remarca cu e tecnicanan di e seleccion di Aruba ta riba un bon nivel.
“Mi ta hopi contento cu esey. Tur e muchanan a haci un bon papel, nos tabatin un bon mehoracion y nos ta preparando pa e siguiente competencianan”, de Kort a indica.
Randy Arends, presidente di Aruba Aquatics Federation, a expresa tambe cu di parti di Aruba Aquatics Federation nan ta sumamente contento cu e presentacion di e team Aruba cu a bay Barbados.
“Nos ta hopi contento cu tur e resultadonan, nos ta felicita e mucha y coachnan y nos ta hopi agradecido na e mayornan cu ta esunnan cu ta e motor tras di e muchanan y cu tambe ta yuda financieramente pa e muchanan aki por participa na tipo di competencianan aki”, el a
Pa loke ta trata e siguiente stapnan pa e seleccion di Aruba aki cu a caba di yega, Kock-Croes a splica cu nan lo sigui train y pa final di juni/juli nan lo bay un competencia na Trinidad y Tobago. Apart di esaki tin tres atleta, cu ta cay bao di Comite Olimpico, cu lo ta biahando pa Rosario, Argentina diadomingo awo, Jayden Croes, Braynsly Dirks y Gavin Kock, pa asina representa Aruba den un otro campeonato.
Kock-Croes a remarca tambe, tocante obstaculonan cu e federacion y landadonan ta enfrenta specificamente aki na Aruba, cu e muchanan di landamento ta train hopi y e parti cu mester drecha ta cu nan mester train mas ora y hopi biaha e subsidio no ta yega pa e muchanan por train. Pero e problema mas grandi ta cu e mayornan mester financia tur e tripnan aki y esey ta algo hopi costoso y pa motibo aki hopi biaha muchanan ta keda sin bay competi pasobra nan no ta logra cubri e gastonan financiero.
“Hopi biaha mayornan ta ricibi un carta y nan ta busca sponsor y mi mester bisa cu e aña aki toch hopi atleta a ricibi bon apoyo di sponsor di parti di companianan cu asina toch ta logra baha e gasto pa mayornan un tiki. Pero nos tin cu cuminsa pensa ariba fundraising pa e atletanan aki por representa nan pais tur aña. E competencia aki ta tur aña y aworaki despues di 2 aña nos t’ey back pa e competencia”, el a agrega.
