Durante un conferencia di prensa diahuebs atardi, presidente di Sindicato di Maestro di Aruba (SIMAR), Josephine Albertus a duna declaracion. Alabes el a elabora riba e veredicto cu e sindicato a ricibi for di corte diaranson, den e caso cu Gobierno di Aruba a entama contra SIMAR pa loke ta trata e accionnan y presion cu e sindicato ta pone pa e eliminacion di e recorte salarial di 12.6%.

Albertus a splica cu den e caso aki, caminda cu Gobierno di Aruba a hiba veld di Enseñansa representa door di SIMAR corte, Gobierno di Aruba a pidi hues tres cos. Prome punto ta cu gobierno a pidi hues pa prohibi e veld y SIMAR pa tene accion di cualkier forma y si no cumpli cu e punto aki, e sindicato lo ricibi un boet di 250 mil florin. E punto aki, Albertus a informa a keda rechasa door di hues. Por lesa esaki den articulo 2.16 y 2.17 di e veredicto.

Segundo punto cu Gobierno di Aruba a pidi hues ta pa SIMAR informa esnan laborando den veld di enseñansa cu nan tin cu bay traha back, locual tambe a wordo rechasa y por lesa esey den e veredicto den articulo 2.16. Den punto number tres, gobierno kier a obliga SIMAR pa paga tur gastonan di e proceso, locual cu tambe a wordo nenga door di hues y por lesa esaki den articulo 2.18 di e veredicto

Di parti di SIMAR, Albertus a informa, tambe tabatin cierto ponencianan pasobra nan tambe tabatin un meta dilanti y pa e motibo ey mes nan wordo hiba corte. El a splica cu SIMAR, cu ta representa e veld di Enseñansa, a trece pa dilanti cu veld di enseñansa tabata kier traha un ora menos pa dia, locual ta ekivalente na 30 minuut menos di les pa dia pa e alumno.

E peticion aki hues a prohibi SIMAR pa haci, locual por wordo lesa den articulo 2.15 di e veredicto. El a menciona cu a bisa cu a rechasa e peticion pasobra e tabata un accion indefini sin un fecha final.

Adicionalmente hues tambe a prohibi e maestronan pa tene un accion colectivo na unda e maestro lo ta poniendo presion riba gobierno pa unilateralmente elimina e recorte di 12.6%. Esaki kiermen riba su mes, sin dialogo cu Hulanda, yega y elimina e recorte salarial.

Loke SIMAR a aclaria ta cu e veld di enseñansa por tene accion, nan no a wordo prohibi di sali y vocifera nan malcontento ariba e 12.6%. “Nos por sali afo pa mustra nos malcontento pasobra den e veredicto mes hues ta bisa cu e ta un derecho fundamental di cada ciudadano pa sali afo y vocifera ora cu nan ta malcontento riba algo”, Albertus a splica.

Albertus a menciona tambe cu como SIMAR ta un sindicato y ta representa esnan laborando den e veld di Enseñansa, nan kier subraya y trece pa dilanti cu un bon dunado di trabao ta tene cuenta cu e bienestar, salud y seguridad di su trahadonan. “Nos por bisa actualmente e dunado di trabou di e veld di enseñansa ta fayando den esaki, e no ta teniendo cuenta cu e puntonan aki”, el a señala.

Albertus a recorda cu na mei 2020 esnan laborando den e veld di enseñansa a ser mal informa ora cu gobierno unilateralmente a drenta den nan cartera y corta cu 12.6%, y aworaki, 23 luna despues, ainda gobierno ta corta den e cartera di e clase trahado.

El a agrega cu aña pasa den luna di november a sali na cla cu na momento cu gobierno a dicidi y corta unilateralmente bao di capa di solidarismo, gobierno no tabata sincero cu e trahado den e veld di enseñansa, pasobra gobierno a informa cu a corta pa baha e gasto di personal di e aparato gubernamental, pero ainda, 23 luna despues, ainda ta sigui corta.

“Pa subraya riba esaki nos por a nota cu e luna aki den parlamento a aproba un presupuesto na unda cu gobierno ta subi su gastonan di personal y tambe ta subi e goederen en diesnten, y alabes ta pidi of exigi di e trahado den veld di enseñansa pa e sigui corta den e salario pa baha gasto y esaki no ta cuadra”, Albertus a enfatisa.

E presidente di SIMAR a agrega tambe cu actualmente ora cu e trahado den enseñansa kier sali pa para pa su derecho, gobierno kier silencia nan ariba esaki tambe pasobra, segun el a splica, luna pasa y e luna aki a corta den e salario di e trahado den e veld di enseñansa cu ta sali pa su derecho bao di e capa di plichtverzuim.

El a enfatisa cu mas cu claro veld di enseñansa no ta contento pasobra ainda 23 luna despues ta sigui corta den su salario y ainda no tin un fecha final cu ta indica cu e recorte salarial lo bira algo di pasado. “Eynan nos ta bisa cu nos man no a wordo mara completo pasobra nos por sali y pone presion y mustra cu nos kier un solucion”, el a remarca.

Albertus a menciona tambe cu hues ta urgi gobierno pa bin cu un solucion duradero structural a corto plaso, locual ta un bon punto pasobra aunke di un banda nan no por traha menos ora, pero di otro banda nan tin caminda pa cana, “y nos lo sigui cana nos caminda y p’esey tambe nos ta bisa cu e lucha ta sigui”.

“Na e veld di enseñansa e lucha ta sigui, keda pendiente pa e siguiente yamada pasobra manera nos a bisa nos por sali y mustra nos malcontento y nos lo haci esaki. Nos no ta bay sinta man cruza mirando tambe cu gobierno no ta mustrando di nan parti, como un bon dunado di trabou, unda por yega na otro y tambe baha e gasto manera cu nan a bisa cu ta e meta pa e recorte”, Albertus a expresa.