“¿Bo ta kere cu aworaki mi por kita 500 dollar di e homber aki?” esaki tabata palabranan cu a keda graba door di e team di observacion di Cuerpo Policial di Aruba (OT) conhuntamente cu RST, na unda cu ex-minister di Hubentud, Asuntonan Social y Labor, Paul Croes, tabata dirigi palabra na su chauffeur na e momento cu nan tabata para den parkinglot di un supermercado den area di Palm Beach.

Un dia prome, a traves di un grabacion di un microfon scondi ‘opname vertrouwelijke communicatie’ (OVC) -cu a wordo poni rond y den auto di dienst di Croes na cuminsamento di december 2016- por a scucha cu e ex-minister a ricibi un par di caha di cerbes, blekinan di tuna y ademas el a recorda e doño di e supermercado cu tambe mester duna 1.000 dollar a cambio cu par di dia despues e lo ricibi un ‘positieve verklaring’.

Esaki ta un muestra di con Croes tabata actua segun un cantidad grandi di grabacion cu Ministerio Publico tin contra su persona.

Fin di luna aki e caso ‘IBIS’ ta bin dilanti den Corte di Apelacion na unda cu 3 magistrado lo dicidi Croes su destino, caminda cu e ta bay defende di su 6 delito cu e la wordo condena pe den Corte di Prome Instancia di a comete den conhunto (delito di) pidi y acepta soborno, abuso di su funcion, comete den conhunto sustraccion (verduistering),  comete den conhunto labamento di placa regularmente,  comete den conhunto duna empleo ilegal y participacion na un organisacion criminal eherciendo como minister den Gabinete Mike Eman 2 cu un castigo di cuatro aña di prizon y e no mag di eherce ningun funcion publico pa un periodo di nuebe aña.

Den caso aki, tambe su casa Melony Michelline Paesch a wordo condena den Corte di Prome Instancia pa complice di duna empleo ilegal (medeplegen van ilegale tewerkstelling) y complice di labamento di placa (medeplegen van witwassen).

Ora Croes tabata den su funcion di minister, na varios ocasion el a haci mal uso di su poder, como por ehemplo, dia 5 di november di aña 2016 un tapgesprek entre Croes y un trahado di dje tabata señala cu Croes a instrui trahadonan di DPL pa no bay controla cierto restaurant y supermercadonan, pa motibo di laso personal cu e doñonan di e establecimentonan aki.

Aeropuerto tambe tabata algo na unda Croes tambe a mal usa su poder, den un otro tapgesprek di 20 di december di 2016 a pidi director di IASA pa laga drenta Aruba un persona stranhero sin carta di garantia, el a bin como turista y a keda como babysitter di famia Croes.

28 di maart di 2017 Ministerio Publico a haci un entrada hudicial na cas di Croes na unda cu a detene e babysitter pa motibo cu e no por a demostra su documentonan di estadia legal na Aruba, ni como turista. Segun ley, tur stranhero tin 90 dia pa keda como turista na Aruba, sinembargo, e persona aki a surpasa e cantidad di dianan y asina mes el a drenta back como turista y a wordo haya trahando den cas di Croes caminda cu el a declara na Landsrecherche cu e tabata wordo paga 1.000 florin pa luna cash door di Paesch.

Loke a hala hopi atencion ta e parti cu ex-minister Croes tambe a wordo condena pa participa den crimen organisa, unda cu tabatin un structura criminal di e cual Ministerio Publico a denomina como un ‘ontheffingen-fabriek’ hunto cu su ex-secretaria Selma Arends, ex-chauffer Roque Aparicio, ex-tramitado Juancho Feliciano y ex-presidente di su fundacion di su campaña politico Giovanni Capriles, na unda cu no solamente nan a bende un cantidad di ontheffingen sino cu tambe Croes a acepta un cantidad di soborno y a usa su fundacion di campaña politico pa cosnan personal, entre otro, pago di su studielening (DUO), joyasnan, brilnan, airco pa su cas, materialnan di construccion pa su cas y pagonan personal di su credit card.

Bon Dia Aruba a observa cu Ministerio Publico tin un ontnemingsrapportage map di caso IBIS, loke ta indica cu tur placa cu a wordo haya door di un manera ilegal Ministerio Publico lo por exigi ex-minister Croes y Paesch pa paga back of nan lo por tuma den beslag como auto, cas, bienes, propiedadnan cu a wordo haya di manera ilicito, manera ta e caso di ex-prome minister di Corsou, Gerrit Schotte cu a wordo condena pa corupcion y labamento di placa caminda e tin cu paga back 1.8 miyon florin.

A pesar di tur esaki, ayera a wordo publica riba un otro medio di comunicacion cu Croes a wordo isola den prizon durante 86 dia cu el a keda cera, segun su abogado defensor a indica esaki ta un violacion di derechonan humano caminda cu tampoco e tabatin contacto cu exterior ni tampoco por a mira TV, radio, corant, revista of un bijbel y cu esey e lo wordo presenta den Corte di Apelacion na fin di luna, cu el a wordo trata como un terorista.

Tambe abogado a comenta cu “Ministerio Publico a usa tur cos na su poder pa purba kibra Paul Croes durante su detencion. Abogadonan di Croes lo denuncia e maltrato aki na Corte di Apelacion. Aruba como parti di e reino tin cu cumpli cu cierto leynan y tratadonan pa proteccion di ciudadanonan, hasta na momento cu nan tin cualkier sospecho penal riba nan”.

“Mirando e acusacionnan cu no ta trata di caso grandi manera Ministerio Publico a laga henter comunidad kere, nan tin hopi pa splica pakico a trata Paul Croes como terorista y a cera pa 86 dia den isolacion den KIA”, asina abogado di Croes a conclui.

 

 

 

LEAVE A REPLY

Please enter your comment!
Please enter your name here