— Ayera nochi, cuminsando alrededor di 7’or, usuarionan di servicio di celular Setar a cuminsa nota cu nan servicio di telefon y data celular a cay afo. Clientenan no por a ricibi of haci yamada, sms of uza internet. Na dado momento e servicio di cablenet a cuminsa bira mas slow, mescos cu e servicio di trunking. Mirando cu internet tabata funcionando ainda, usuarionan a subi riba Facebook puntrando si otronan tambe no tabata hayando mas servicio. Via medionan online Setar a laga sa cu tecniconan na warda a cuminsa traha riba soluciona e interupcion grandi aki. Mester bisa cu ora di cera e edicion di Bon Dia Aruba di awe, e servicio di celular ainda no tabata bek den funcion.
