Dwayne Johnson lo ta anfitrion, y Shakira, Miley Cyrus y Jennifer Hudson lo presenta den un concierto transmiti globalmente, pidiendo lidernan local pa haci test y tratamento di coronavirus disponibel y igual pa tur.
Organisacion Global Citizen y Comision Europeo a anuncia ayera cu Global Goal: Unite for Our Future- The Concert lo ser transmiti dia 27 di juni. Otro artistanan participando ta inclui Usher, Justin Bieber, Coldplay y Chloe x Halle.
E concierto tambe lo conta cu participacion di Billy Porter, Charlize Theron, Chris Rock, Kerry Washington, Salma Hayek y David Beckham. Lo transmiti riba NBC na Merca y otro stacion di television, radio, website y streaming rond mundo.
“E evento tin como meta pa eleva e comunidad global cu ta abordando acceso igual na cuido di salud, y otro inhusticianan enorme cu nos mundo ta enfrenta”, Johnson a bisa den un declaracion.
Organisadonan ta bisa cu e show no ta pa recauda fondo, sino pa hala atencion na e impacto desproporcional cu e pandemia di coronavirus tin riba comunidadnan marginalisa.
“Ciudadano Global rond mundo ta yamando pa cambio sistematico, cambio cu ta trece husticia pa tur hende, tur caminda sin importa unda nan a nace of e color di nan cuero”, fundador di e organisacion, Hugh Evans a bisa. “Si nos kier caba COVID-19 pa tur, nos mester pa nos lidernan global compromete e biyones di dollar necesario pa entrega test, tratamento y vacuna igual.”
E concierto ta sigui Global Goal: United for Our Future- The Summit, un evento via streaming cu discusion di panel y entrevista di periodistanan manera Katie Couric, cu tambe ta supone di ta ‘un momento di promesa global den cual lidernan mundial, corporacion y filantroponan lo anuncia compromisonan nobo’ pa yuda distribui test, tratamento y vacuna equitativamente como tambe reconstrui comunidadnan, segun e declaracion.
