(AFP)—Mas cu 400 persona cu sombre preto tipo bowler, mustashi chikito y baston a reuni na Suisa diadomingo den un intento pa kibra e record pa e encuentro mas grandi di imitadornan di Charlie Chaplin.
E evento inusual, cu a atrae fanaticonan di Chaplin di tur edad, a tuma lugar na un museo dedica na e legendario productor di pelicula na loke tabata su cas na Corsier-sur-Vevey den west di Suisa.
Organisa pa marca e di dies aniversario di apertura di e museo, e encuentro a atrae 429 imitador di Chaplin, kedando insuficiente di e record mundial estableci na e mesun lugar na 2017, ora 662 persona a participa.
Pero esey no a afecta e ambiente.
Bao un solo fuerte, e Chaplinnan a reuni hunto pa forma un number 10 grandi riba e yerba dilanti di e cas di campo unda e icono cinematografico Ingles a pasa e ultimo 25 aña di su bida.
“Mi ta sinceramente e homber mas feliz cu a biba,” Anthony Champeil, un Frances elegante di 36 aña cu tabata parce exactamente Chaplin, a bisa, splicando cu e ta un actor cu hopi biaha ta interpreta e leyenda di cine riba escenario.
“Nos ta na cas di Chaplin cu hendenan cu ta apasiona pa Chaplin,” el a bisa AFP.
Sugeriendo cu Chaplin tabata kier anima hende pa mantene un capacidad infantil di asombro y hungamento pa lo mas largo posible, el a bisa cu probablemente e actor lo a gusta mira centenares di “mucha grandi reuni akinan awe.”
“Mi ta haya esaki maraviyoso.”
E museo ta situa riba e propiedad di Manoir de Ban, aproximadamente 26 kilometer for di Lausanne, unda Chaplin a biba cu su esposa Oona y nan ocho yiu te su morto na 1977, na edad di 88 aña.
El a muda bay Suisa despues cu a prohibie drenta Merca den añanan 1950 pa sospecha cu e tabatin simpatianan comunista, memey di paranoia di Guera Friu tocante infiltracion Sovietico.
Alice Kauffmann, kende a trece su yiunan chikito pa participa como Chaplin chikito, a bisa cu e encuentro di diadomingo tabata “emocionante” pa mira.
E y otro participante a bisa cu e evento a recorda nan di e idealnan humanitario cu Chaplin a promove cu peliculanan iconico manera “The Great Dictator”, “The Kid” y “Modern Times”.
“El a defende amor, respet y balornan bunita,” el a bisa.
Sophie Teteule, di 52 aña, a concorda.
“Mi ta stima Charlie Chaplin, y mi ta stima e lugar aki,” el a bisa AFP.
“Mi ta pensa cu ta magnifico cu nos por reuni awe, hopi tempo despues cu el a laga nos. E ta un momento maraviyoso den su honor.”
Organisadornan di e evento di diadomingo tampoco tabata hopi preocupa cu nan no a logra kibra e record mundial, cual e museo mes ya ta posee.
“Nada a keda perdi,” vocero Olivia Baliguet a bisa AFP.
“Ken sa, porta nos lo purba atrobe otro aña, of pa e 20 aniversario.”
