Den e dianan aki nos ta cay di un sorpresa den otro. Apenas nos a caba di pasa den e asunto di e mandatario di enseñansa cu ta kere cu den e temponan dificil aki tin placa pa digitalisa henter nos enseñansa, awor ta bin un otro proyecto teni bon secreto, e traspaso di Colegio San Nicolas na Stichting Onderwijs Combina, cu ta opera e scol De Schakel. Ta bon si pa nos separa argumento encuanto e fundacion y decision cu gobierno ta tuma, den luz di nan responsabilidad pa enseñansa publico.

E fundacion menciona tin varios aña ta opera na Aruba, y a crea en berdad un reputacion solido pa loke ta su resultadonan. Esey tin su pakico. Un scol independiente, cu a opera te awor sin subsidio di gobierno, ta existi a base di un contribucion di mayornan cu solamente un porcentahe hopi abao di e total di famia na Aruba por paga. Esey ta trece cune un cierto seleccion den e clase cu ta haci uso di e facilidad. Esaki ta trece memoria di mas di 50 aña pasa, tempo cu Colegio Arubano tabata accesible solamente pa un grupo mas chikito y mas privilegia, y tambe tabatin excelente resultado di riba 90% di candidato cu tabata slaag pa examen final. Y esey ta e argumento cu e ministro ta menciona den su decreto como motibo pa entama e traspaso aki.

Acceso na fondo amplio a facilita uso di personal bon califica y nan tin e merito di a logra nan meta. Mester bisa si cu De Schakel ta manehaun grupo reduci di candidato pa examen final, algo completamente diferente cu Colegio San Nicolas cu ta hopi mas grandi. Cu e subsidio otorga di banda di gobierno esaki lo mester bay cambia, pasobra gobierno ta subsidia te na e nivel cu ta aplicable tambe den enseñansa publico. Kico esaki ta implica pa e actual modelo di financiamento di nan scol ta pa e fundacion contesta; nan lo sa cuanto extra nan ta exigi di e mayornan.

E otro aspecto pa contempla ta cu Colegio San Nicolas, un scol te awor publico, ta duna posibilidad na hobennan di e ‘poverty pocket’ mas grandi di Aruba haya enseñansa avansa. Cu e nivel di e scol mester mehora no tin ningun duda, pero nos mester discuti tambe kico por ta consecuencia di e politica cu e fundacion lo bay hiba. Ta bira por ehemplo posible cu nan ta mustra cierto alumnonan porta, pasobra nan ta ‘rebaha e nivel di e scol’, segun opinion di e directiva? Y si nan no por sigui na e scol ey, unda nan lo bay pasobra e unico posibilidad pa bay un scol di e tipo aki na Aruba ta Colegio San Nicolas. Lo mester bolbe pa busca lugar na Colegio Arubano, manera tanto aña pasa tabata normal pa tur alumno di San Nicolas y alrededor, pagando ademas un contribucion mas halto? O ta bay habri un ‘Colegio San Nicolas 2’ pa cumpli cu e tarea gubernamental di percura pa enseñansa pa esnan cu no por acudi na un scol priva?

Tambe nos a keda sorprendi pa e velocidad cu cual a tuma decision den e asunto aki, na nivel di conseho di ministro. E decreto mes ta conta cu dia 16 di maart 2020 e fundacion a duna di conoce su deseo pa tuma e scol over, y pa su mañan tabatin un decision den conseho di ministro. Nos por conclui cu den un caso di tanto peso, conseho di ministro a dicidi a base di un carta di e fundacion cu a caba di cay den nan postbox? O e asunto aki tabata cushina pa mas tempo caba, di forma confidencial? Pasobra si a atende e asunto na un manera regular, no tabata logico pa institui un comision investigativo, pa analisa pro y contra di e asunto aki? Y si no tin un rapport adecua, pakico no a traha esey? Nos ta spera cu ora ministro topa cu e comision di parlamento, lo puntra tambe pa comparti cu nan e rapport aki. Tristo lo ta si mester constata cu e mandatario responsable y conseho di ministro ta actua sin un base di un estudio di experto serio cu a mira e caso aki di tur banda.

Di otro banda, si acaso a haci un bon analisis di e asunto, pakico no a practica e tan afamado transparencia y a comparti e plan cu comunidad? O por ta cu e debaclenan den otro plannan mal pensa a haci cu awor ta pasa pa prepara e tipo di plan aki den secreto, pa despues tira esaki riba mesa den estilo di asalto, na momento cu e mandatario a compromete su mes caba cu e fundacion? Si esey ta asina, anto nos a bolbe yega na otro ‘logro’ pa e gabinete aki, cu a cuminsa asina bon cu e plannan expresa den nan programa di gobernacion, unda e palabranan magico tabata transparencia y integridad?

Si ta pensa cu asina ta garantisa mehoracion di Colegio San Nicolas, nos ta mantene nos duda. Coach un grupo chikito di mucha cu ta paga 10.000 florin pa aña ta algo otro cu run un scol publico cu ta duna lugar na tur, tambe esnan di poco recurso.

 

LEAVE A REPLY

Please enter your comment!
Please enter your name here