Durante e conferencia di prensa diahuebs mainta, presidente di Sindicato di Maestro di Aruba (SIMAR), Josephine Albertus, splica tocante un parti di e resultadonan cu SIMAR a saca afo durante e conferencia di dia 10 di mei ‘Enseñansa, Nos Responsabilidad’. Albertus a elabora ariba algun punto cu a resalta di parti di participantenan como tambe di parti di e sindicato cu ta importante pa e veld di enseñansa.

Albertus a indica cu e conferencia a bay hopi bon y tabata exitoso mirando cu pa SIMAR como indicato ta hopi importante pa crea y concientisa e pueblo completo pa tambe ricibi informacion y durante e conferencia nan por a duna informacion riba e retonan cu tin den veld di enseñansa y tambe e perspectivanan cu e retonan aki lo trese cune.

El a remarca cu e conferencia tabata un oportunidad pa nan duna informacion y nan haya hopi bon tambe cu e tabata un lectura interactivo na unda cu esnan presente y na cas por a haci pregunta y na mesun momento duna nan ponencianan.

“Asina ey e tabata interactivo na unda cu nos tabata brinda informacion y alaves nos tabata ricibi informacion, y esey ta hopi importante pa nos como sindicato mirando cu nos ta vocifera e preocupacionnan cu tin den e veld, sali pafo y duna informacion den esaki”, el a señala.

Albertus a indica cu den e mesun sala cu SIMAR a sinta Departamento di Enseñansa tabata presente na unda cu e director di e departamento a splica ki perspectiva nan ta bezig cune caba, y ki innovacionnan ya caba ta andando. Segun el a sigui splica loke a sali afo tambe ta cu hopi biaha e veld y pueblo no ta na altura di ki innovacion tin, dus tabatin tambe critica constructivo cu a wordo duna na Directie Onderwijs pa nan corda cu nan mester brinda informacion den un forma efectivo.

E presidente di e sindicato a subraya cu SIMAR a yega su meta pasobra nan a ricibi tambe feedback, no solamente di e veld di enseñansa pero di diferente stakeholders di diferente area na Aruba. Esaki, Albertus a indica, a habri lasonan tambe pa despues sigui brinda informacion y sigui traha hunto pasobra manera e tema di conferencia ta bisa, enseñansa ta algo cu mester wordo carga hunto.

Pa loke ta trata e ponencianan unda cu nan a bisa cu pa por tin innovacion esnan cu tin cu ehecute mester participa y ta envolvi, Albertus a menciona cu nan ta contento pa tende cu esnan cu tabata presente por a duna nan opinion riba e ponencia y tambe a bay di acuerdo cu e ta hopi importante.

Otro ponencia cu e sindicato a presenta ta pa crea ora y posibilidad pa e profesionalisacion di e veld por ta algo realistico. El a subraya cu ora cu kier innova y desaroya, e mester ta algo continuo, no ta algo di awo y despues no tin ora pe, y esey tambe, el a indica, cu esnan cu tabata presente na e conferencia a bay di acuerdo cune.

El a enfatisa cu tambe door di trese informacion afo, concientisando e pueblo completo riba e retonan cu tin, a pone tambe cu nan ta haya comprension y compronde cu como sindicato nan ta para, vocifera y purba di trese e interes di e veld di enseñansa pa dilanti y alaves haya informacion di stakeholders den enseñansa.

“Pa nos como sindicato e tabata un conferencia hopi bon, fructifero, unda cu nos a haya informacion pa nos por sigui riba e parti pa garantisa e interes di e veld di enseñansa y tambe pa asina nos por sigui traha conhuntamente cu diferente stakeholders pa nos por hisa e calidad di nos enseñansa y brinda tambe un desaroyo realistico pa tin fruto di dje den futuro di pais Aruba”, Albertus a resalta.

Pa loke ta e retonan cu tin, Albertus a menciona cu un di nan ta infrastructura. Infrastructura no ta solamente edificio, el a señala, pero e ta tambe e hermentnan cu tin, e electricidad, e internet, ntre otro, y esey tambe ta cosnan cu tin nan retonan cune.

El a remarca cu tur scol tin un mantencion cu mester tuma luga, e diferencia ta cu e gravedad, e seriedad di cada scol ta otro. “Un scol lo tin un of dos cos unda cu mester mantencion y otro tin hopi cos. Kiermen por bisa cu cada scol tin mester di mantencion pasobra tur edificio mester nan mantencion, pero na cierto edificio e ta mas pio cu otro”, el a agrega.

Albertus a menciona tambe cu hopi biaha loke nan ta scucha como sindicato, tambe ora cu nan sinta cu DOW, ta cu e presupuesto cu tin no ta realistacamente suficiente pa carga tur e renobacionnan cu mester.

Loke a sali afo tambe pa SIMAR ta cu den un parti di innovacion unda cu tin desaroyonan nobo, algo cu Directie Onderwijs mes a papia di dje, ta u no ta tur scol ta mesun leu den desaroyo di innovacion y esey tambe tin su retonan cune.

Loke a sobresali hopi biaha, Albertus a subraya, ta e leynan anticua y e oranan. Pesey pa SIMAR un di ponencianan ta pa crea oranan pa e docentenan por profesionalisa nan mes. El a recorda cu ora cu kier tin innovacion, nan kier pone e alumno central, pero si esnan laborando den e veld pa guianan den nan trayecto como docente, como coach, como diferente otro meta, no ta cla, nan no ta comodo den e parti di innovacion, e ta bira dificil pa e alumno bin na prome luga

El a sigui splica cu den nan presentacion nan a tuma tres herment di innovacion cu mesterr bin pa asina tin un fundeshi solido. Un di nan tabata e leynan anticua cu tin pasobra pa por tin innovacion no por tin leynan anticua cu lo por strobe e proceso di innovacion.

Den e parti di e tarea di e maestronan, Albertus a enfatisa un biaha mas e cantidad di ora cu nan tin pa e por brinda enseñansa na e alumno, pa nan por prepara pa profesionalisa nan mes. Esey, Albertus a subraya, ta algo cu ainda mester wordo dilinea pa e por bay na un manera realistico pa ora cu tin innovacion e ta na un manera cu por garantisa continuidad.

Pa loke ta e parti di finansas, otro punto principal cu SIMAR a trese pa dilanti, Albertus a splica cu no por pidi un scol duna diferente cos na un nivel of cu e mester ta na mesun cos cu otro islanan den reino, na unda cu nan si ta haya mas fondo y na Aruba tin menos fondo, pero toch mester yega na e mesun meta cu nan.

LEAVE A REPLY

Please enter your comment!
Please enter your name here