Riba website di noticia independiente di Universidad di Utrecht, dub.uu.nl, a publica un articulo den cual ta indica cu pa fortalece e capacidad di gobernacion den e islanan di Caribe, Universidad di Utrecht y Haagse Hogeschool ta bay ofrece un programa di estudio di administracion publico part-time, den colaboracion cu Universidad di Aruba y di Corsou.

Segun e articulo, Secretario di Estado pa Relacionnan di Reino, Alexandra van Huffelen, ta keda preocupa pa gobierno di Corsou. Segun e Secretario di Estado, e pais ta confronta hopi problema cual gobierno no por resolve.

Esaki ta un di e motibonan principal pa bin cu un mayor colaboracion cu educacion avansa na Hulanda. Haagse Hogeschool y Universidad di Utrecht tin plan pa cuminsa cu un programa nobo di estudio di administracion publico part-time den Caribe Hulandes.

“Esaki lo mester fortalece e capacidad di gobierno na e islanan,” segun ministerio di Educacion, Cultura y Ciencia a bisa den un comunicado. E institucionnan Hulandes ta bay colabora cu e universidadnan di Aruba y Corsou.

Comienso di e aña aki, ministerio di Educacion Hulandes, Robbert Dijkgraaf tabata di bishita na Aruba y Corsou pa discuti con e institucionnan educativo di e islanan den Caribe y di Hulanda Europeo por yega na un miho colaboracion. Tin plan pa mehoracion den formacion di maestro, entre otro.

Haagse Hogeschool a bin ofreciendo un specialisacion den asuntonan di Reino pa algun aña caba. Den esaki, ta analisa e relacionnan entre e Hulanda Europeo y e parti Caribense di Reino. Sinembargo, e colaboracion estrecho den un programa acredita ta, te unda ta conoci, algo nobo.

Departamento USBO di Universidad di Utrecht ta bin colaborando pa 15 aña cu Universidad di Aruba den un programa cientifico di administracion publico na Universidad di Aruba. Profesor di administracion publico, Wieger Bakker, ta involucra den e programa aki como profesor extraordinario, y a biaha den representacion di Universidad di Utrecht hunto cu minister di Educacion, Dijkgraaf.

 

Ademas di e plan pa e programa di estudio conhunto part-time, tambe a yega na un acuerdo pa fortalece e colaboracion riba educacion y investigacion den e region den un sentido mas amplio. Esaki ta inclui e desaroyo di programanan di estudio y investigacion conhunto.

Tambe ta bay busca un manera pa stimula intercambio di studiantenan procedente di universidadnan di Aruba y Corsou pa Hulanda. Den un debate siman pasa, miembronan di Tweede Kamer a solicita na minister Dijkgraaf pa mehora e transicion for di e islanan Caribense na Hulanda, entre otro, a traves di e re-introduccion di e asina-yama “ministersplaatsen.”

Te cu 2017, tabata sortia 46 puesto den programanan di estudio Hulandes cu restriccion di admision entre studiantenan di e islanan di Caribe Hulandes, pero esaki a keda elimina na momento cu solamente e programanan di estudio manera medicina y fisioterapia por a keda selecta. Esaki a resulta den menos studiante for di Caribe den e programanan di medicina.

Segun e articulo di dub.uu.nl, gobierno ainda mester responde na esaki. E reintroduccion di e ministersplaatsen ta un di e posibilidadnan cu ta den consideracion.