Situacion di trahadonan di refineria ta keda un preocupacion pa 2019

2018 no tabata uno di accion, pero si di bastante mediacion

Si nos compara 2018 cu aña 2017 pa loke ta trata e cantidad di referendum sosteni, e aña prome tabata menos. Mediador di Gobierno, Anselmo Pontilius a duna un balans di e referendumnan entre 2017 y 2018.

Na 2017 tabatin 15 peticion di referendum, y di e total aki 13 a wordo realisa pidi pa diferente sindicato, mientras cu dos compania a reconoce e representacion di e sindicato sin mester realisa e referendum. Na 2018 tabatin menos referendum, e no tabata mas cu 10.

Pa loke ta conflicto laboral, e ta haya cu a pesar cu por tin confrontacion verbal entre sindicato y dunado di trabou, hopi di e ‘confrontacion aki a tuma luga den prensa, y no mediante welga.’ Pero encuanto conflicto laboral mes, caminda tin oranan di trabou cu ta wordo sacrifica y cu e confrontacion ta yega te cu e sindicato ta uza welga como su ultimo recurso, esey no tabata e caso durante 2019. Segun Pontilius, e parti di dialogo ta keda prevalece.

Mediacion

E aña aki a wordo caracterisa pa ta uno no di accion, pero si di bastante mediacion. Esaki a y ta sigui tuma luga tanto na Imsan, hospital y varios otro companianan mas, caminda Mediador di Gobierno a realisa su tarea di mediacion. Dos tarea grandi e departamento aki tin, un di nan ta esun di atende cu referendum y tambe sea cu tin conflicto of no, e partidonan por pidi na Mediador di Gobierno pa intermedia. El a yega di realisa e tarea aki den varios caso di negociacion di contracto colectivo (CAO). Pontilius ta haya cu e tipo di mediacion aki no tabata diferente entre 2018 cu 2017, ya cu nan tabata casi igual.

Tin periodo cu esaki por ta mas, ya cu por ehempel tin sindicato manera FTA, STA, SEPPA y ABV, cu ta e sindicatonan cu mas ta negosha CAO. Nan ta negosha CAO pa periodo mas largo, y esaki ta permiti cu tin un periodo di trankilidad, den cual e CAO ya ta vigente; y no tin mester di intermedia. Solamente si ta wordo presenta situacion nobo.

Mediador di Gobierno mester a intermedia den e caso reciente, cu a surgi entre STA y gerencia di aeropuerto (Triple A), pa asunto di pensioen di nan trahadonan. E no ta un punto cu necesariamente Mediador di Gobierno mester ta envolvi, pero considerando cu e ta un punto hinca den nan CAO, e sindicato a pidi presencia di Mediador di Gobierno pa duna su opinion y sugerencia. Pero pa atende esaki entre e partidonan pa mira si tin otro salida.

Tambe recientemente departamento di Mediador di Gobierno mester a brinda su intermediacion na hospital, den cual a surgi e impasse entre sindicato ABV, gerencia di hospital y hunta di comisario. E ta un asunto di relacion cu otro, caminda e sindicato a pidi Mediador di Gobierno pa por haya e partidonan na mesa pa atende di resolve nan diferencianan.

Igualmente, Mediador di Gobierno a haya su mes envolvi cu e situacion den e departamento di Duana, entre sindicato SADA, Gobierno y gerencia di Duana. E no ta un caso usual, mirando cu Mediador di Gobierno como institucion no ta atende cu e casonan particular di empleadonan publico. Ya cu nan tin nan mesun mecanismo pa atende cune. E aña 2019 ta habri cu e partidonan na mesa, pa sigui cu nan dialogo pa trata di resolve e situacion cu a surgi entre partidonan.

Negociacion 2019

Pa e aña 2019 cu a caba di habri, Mediador di Gobierno su perspectiva ta cu e no ta mustra cu lo tin hopi negociacion di CAO. Un preocupacion cu ta keda, ta esun di e situacion di e refineria. Muy specialmente kico ta bay pasa cu e situacion di e trahadonan, pero eventualmente esaki no ta problema cu mester yega cerca Mediador di Gobierno. Pero si e ta keda un preocupacion riba mercado laboral, si den caso CITGO no ta continua cu loke a wordo plania a base di e acuerdo firma cu gobierno. E ta haya cu den todo caso, como pais Aruba nos mester ta prepara p’e y sigui vigila e situacion aki di cerca.

E aña aki tambe ta habri cu e echo cu e sindicato STA a pidi pa mediacion cu e asociacion di contratistanan WAB. Nan a palabra tres fecha durante e luna aki, caminda dia 10 di januari nan lo tin e prome ronda di negociacion pa un CAO nobo.

Mediador di Gobierno a desea tur lesado di Bon Dia Aruba y henter pueblo di Aruba un aña 2019 positivo y hopi pasenshi pa e matutino aki sigui cu su tarea di informa.

You May Also Like

Permanencia Ilegal (1).JPG

Te cu 4 aña castigo pa yuda persona ilegal

Ministerio di Husticia lo bay over na conduci casonan penal contra personanan cu ta ...

Presupuesto 2018 lo mester keda trata prome cu 25 di april

Presupuesto 2018 ta canando su caminda pa mediado di e luna aki lo wordo ...

Cuater compania internacional a confisca crudo di tanker Icaro

WILLEMSTAD – A pesar di un veredicto di corte civil cu por los e ...

Rio 2016

Team olimpico di Aruba cla pa ceremonia di apertura Rio 2016

Ta falta tiki pa e ceremonia di apertura di e Weganan Olimpico 2016 na ...

30janNG Polis (2).jpg

Polis a scual grupo di mucha cu no ta bay scol

Diabierna den careda di 12:30 merdia patruya di San Nicolas ta topa cu un ...

Cas bandona den Venezuelastraat na candela

Dialuna anochi tabata tin basta huma saliendo for di un cas den Venezuelastraat. Tanto ...