E situacion financiero na Aruba den e ultimo tempo aki no ta den su miho momento pa hopi hende. Riba e portal social di Facebook por nota cu ultimamente tin basta ciudadano ta papia habri di nan situacion y ta pidi pa ayudo. Bon Dia Aruba a haya varios notificacion cu lo tin personanan cu ta publica potret di nan fridgidair y mustra con bashi e ta. Esaki ta pasando specialmente den e asina yama Facebook Groups, siguramente den esunnan popular manera esun di ‘Vraag en Aanbod’.
Nos ta ripara cu e reaccion di comunidad en general ta positivo ya cu hopi ta purba di biaha pa duna un man cu cuminda. Por nota tambe cu tin algun persona y/of compania cu ta trata na yuda cu un trabou. Den pasado ex directora di Fundacion Pa Nos Comunidad a señala cu e demanda pa paketenan di cuminda ta uno alarmante y cu no por cumpli cu e demanda. Awor cu medionan social por wak cu e esaki ta birando mas visibel y ta duna e impresion cu desesperacion cu e situacion ta trece cu ne ta pone cu hende ya no tin berguensa di pidi pa ayudo.
Pa loke ta bijstand tambe por wak un crecemento den esaki, no obstante cu a bin cu un proyecto yama ‘Ban Traha’ cual meta ta pa baha e cantidad di esunnan cu ta haya e ayudo social. Bon Dia Aruba lo tuma contacto cu e instancianan y departamentonan concerni pa busca mas informacion.
