SKOA: ‘E idea ta pa tur scol por haya airco’

SKOA (Stichting Katholiek Onderwijs Aruba) a duna un splicacion di kico ta spera pa aña nobo y preparacion pa 2020/2021. Algun reto cu nan tin cu scol cu ta afo di nan localidad normal.

Director di SKOA, Anuesca N. Baly a splica tocante e 4 scol cu nan tin afo di nan localidad normal. Nan tin Imelda kleuterschool cu ainda ta na Dakota Shopping Paradise, Sint Aloysius School cu tambe ta afo y ta wardando pa renobacion.

Colegio Frère Bonifacius a bisa cu nan tin hopi aña pafo di localidad. Colegio San Jose cu ta den e mesun localidad, pero ta haciendo algun trabou eynan, tin cu basha un parti di scol y ta tramitando con por logra esaki.

SKOA a haya reunion cu minister di Infrastructura saliente, ken a bisa cu pa 2020 tin un caso pa Sint Aloysius tin su renobacion y esun nobo, cu tabata e caso cu Frère Bonifacius na 2018, cu e scol lo bira un smart school, y pa esakinan ‘e palabracion ainda ta vigente’.

Nan kier mira Frère Bonifacius, cu ta un scol cu tin hopi aña y hopi hende a atende e scol durante transcurso di tempo, pa e aña aki pone e prome piedra pa asina lanta e scol pa tin edificio nobo pa 2020/2021.

Tin demanda creciendo pa scol, mirando cu tambe ta biniendo studiante di otro pais cu mester regula. Baly ta remarca cu cada mucha tin derecho riba enseñanza.

Infrastructura di scol pa locual ta trata e desaroyo di airco, e ta bisa cu nan ta consciente di keho relaciona cu esaki. Na e momento aki, Baly ta bisa cu tin 8 scol cu ta cay bou di SKOA cu no tin airco. Di nan tin dos scol cu ta bay pone riba agenda pa haya e airco. Esey ta Sint Franciscus y Bon Bini, y despues lo sigui cu e otro scolnan.

Pa locual ta trata e keho di calor, nan sa cu tin algun scol cu nan localidad no tin circulacion di aire. Por ehempel Fatima College y Jacinta kleuterschool cu ta den bario cera, sin circulacion, unda cu mester tuma decision pa nan bay cas trempan pa motibo di calor.

E problema di calor por ta cu e muchanan y docente por perde concentracion. Por mira cu si solamente tin un persona den un localidad ta bon, pero si agrega 25 mucha, e temperatura ta bira mas halto.

“Nos ta spera cu aña aki, aunke tin reto pero di otro scol cu no tin airco, tambe por bin riba lista pa por tin’e. Asina tur scol na Aruba por tin airco. Nos a menciona cu 8 scol di 46 scolnan no tin airco ainda”, el a splica.