E delegacionnan parlamentario di Curaçao, Aruba y Hulanda a tene siman pasa na Curaçao nan reunion bi-anual, unda a trata varios tema. A discuti e situacion na Venezuela, cu raportahe di e asunto for di angulo di e diferente paisnan.

Di banda di Curaçao cu ta parce e caso mas urgente, tabatin un presentacion di e crisiscoordinator. Tambe a papia di e ‘Sustainable Development Goals’ (SDG) People y SDG Planet/Prosperity cu ta hayando atencion special den e gruponan di trabao specifico pa esaki. Atencion a bay tambe na e progreso den e grupo di trabao cu ta atende integridad. E delegacionnan a toca tambe e tema di observacion mutuo di eleccion den e diferente paisnan di Reino. Esaki no a termina cu acuerdo concreto pero lo continua discusion proximamente.

Situacion Venezuela.
Ta señala importancia di presion efectivo internacional riba (gobierno di) Venezuela, entre otro for di Hulanda. Colaboracion den region ta importante pero no ta anticipa tanto acuerdo nobo, manera cu Colombia. No ta spera cambio rapido tampoco na Venezuela, cu consecuencia cu lo no tin un solucion rapido pa e islanan cu tin mas problema cu e migrantenan. Delegacionnan ta di acuerdo cu atencion inhumano no ta bon y mester yega na un envolvimento di tur pa yega na pasonan dentro di Reino, tambe pa loke ta e colaboracion cu otro pais cu ta bay via Reino. Ta considera e situacion na e islanan abao (Curaçao, Aruba, Bonaire) como un crisis, y cu talvez lo por yega na un organisacion di crisis conhunto pa por traha cu mas urgencia na posible solucion concreto.

Observacion di eleccion.
E delegacionnan por a tuma nota di e custumbernan cu tin den e diferente paisnan pa loke ta observacion di eleccion. E delegacionnan a subraya e importancia grandi di mision di observador di eleccion den nan pais. E observacion cu tin como meta observa si eleccion den un pais ta tuma lugar di un manera liber y husto, y raporta tocante esaki. Di e manera aki ta spera un contribucion na eleccion liber y husto den e cuatro paisnan den Reino. Sin embargo, durante e IPKO aki e delegacionnan no por a yega ainda na un acuerdo di un forma structural di observacion di eleccion haci pa parlamentario dentro di Reino.

Grupo di trabao SDG People.
E grupo di trabao SDG People a papia di forma efectivo di combati pobresa den tur pais di Reino. Pa esaki ta importante yega na standarisacion di dato y metodo relaciona cu e SDG-nan mas relevante. P’esey e grupo di trabao a conseha pa laga e Oficinanan Central di Estadistica (CBS) di e paisnan maneha e standarisacion aki. Tambe a discuti e importancia di stimula recuperacion y stabilisacion economico riba e islanan a traves di desaroyo di opleiding di turismo riba e islanan, si ta posible conhuntamente y poniendo atencion tambe riba diversificacion di energia sostenible. Tin pais cu ta mas leu cu esaki cu otronan y ta haci uso di diferente fuente, y esaki ta ofrece posibilidad di apoyo mutuo na otro.

Tambe a discuti e posibilidadnan den enseñansa, unda ta constata cu colaboracion ta keda importante, manera ta resulta di e informacion duna pa DUO na e islanan y e preparacion pa estudio na Hulanda. E delegacionnan ta haya e recomendacion di e grupo pa aumenta e accesibilidad na examen di estado pa habitante di Aruba, Curaçao y Sint Maarten, por ehemplo pa laga haci e examen na nan respectivo pais mes. Tambe ta constata cu turismo y horeca ta e elementonan principal di desaroyo economico di e paisnan den Caribe y cu por lo tanto ta importante pa duna hoben di e paisnan aki e oportunidad pa sigui un opleiding den horeca-turismo, parcialmente na nan propio pais. Ta haci un yamado na e gobiernonan pa colabora den esaki cu e institutonan Hulandes riba e tereno aki.

Grupo di trabao SDG Planet /Prosperity.
A papia di e presion di poblacion den diferente pais unda tur tin nan causa di esaki. E grupo di trabao ta subraya tambe e importancia di diversificacion di energia sostenible. Na Hulanda no a yega ainda na e proporcion total desea di energia sostenible. Den e otro paisnan ta haci uso di fuente alternativo manera solo y biento, pero miho uso lo ta deseable. Ta importante desaroya cifra comparable pa e paisnan pa por compara e desaroyo den cual e paisnan ta pasando. E grupo di trabao tin como meta pa fin di maart 2020, ora e raportahenan di SDG tocante 2019 lo a drenta, pa haci mas tanto posible e comparacion ey, y considera e siguiente pasonan.

Grupo di trabao integridad (di gobernacion).
Durante IPKO di juni 2019 a dicidi cu e tratamento di SDG16 (Paz, Husticia y Institucion Fuerte) ta keda integra den e grupo di trabao Integridad. Segun e grupo di trabao ta bisa cu pasobra e paisnan den Reino regularmente ta ser confronta cu issue y incidente riba tereno di integridad di gobernacion, cu mantenimento di integridad lo mester ta pidi un esfuerso permanente di e parlamentarionan y di parlamento mes. Den esaki e parlamentonan mester por duna otro apoyo. E grupo di trabao por lo tanto lo traha un inventarisacion di e reglanan di integridad y e provisionnan actual manera nan ta conta pa e parlamentonan den Reino. Seguidamente lo compara e inventarisacion aki cu reglanan internacional existente riba e tereno aki. Por busca apoyo externo tambe si ta necesario pa por yega na un conseho pa pone riba agenda di IPKO pa januari 2021.

Tambe e grupo ta pidi atencion pa e circunstancianan bao di cual preso condena y preso den detencion provisional ta ser atendi den e parti Caribense. Riba e terenonan aki ta pensa cu por mehora hopi ainda ora ta trata di alternativa pa prison, manera supervision electronico, uso di castigo den forma di trabao y curso, y miho uso di resocialisacion. Ta constata cu a corto plazo ta dificil pa yega na mehoracion di e situacion di esnan deteni, pa motibo financiero. IPKO ta haci un yamado na e ministronan envolvi pa den nan encuentro (den e siman aki) di nan consulta di husticia pa lanta un taskforce pa bin cu proposicion pa mehora e situacion di e detenidonan den e paisnan di Caribe. E peticion na e ministronan ta pa prome cu fin di 2020 tin un informe cu por bay pa e parlamentonan di Reino.

E delegacionnan na final di e encuentro a bishita e baraknan di detencion di e stranheronan indocumenta, pa haya un impresion directo di con e circunstancianan ta.

*Potret: The Daily Herald

 

LEAVE A REPLY

Please enter your comment!
Please enter your name here