SMFA ta fortalece su contacto internacional: Restauracion ex- Botica Aruba por tin efecto positivo pa centro di ciudad

Stichting Monumenten Fonds Aruba (SMFA) ta bin trahando pa rescata y conserva den nan forma original nos edificionan monumental. Un joya monumental cu lo haya atencion e aña aki ta esun di ex Botica Aruba situa na Steenweg.

PR di SMFA, Mircla Nava kende tur aña ta traha riba educacion y conscientisacion di nos muchanan di scol, a informa na Bon Dia Aruba cu ya caba nan ta trahando riba e diseño di e edificio menciona pa cuminsa cu e restauracion e aña aki. Nan a haci investigacion tras di historia di edificio aki cu originalmente tabata di propiedad di Sr. Eddison Croes, pa bin cu cierto adaptacion riba e diseño.

Te ainda nan no tin un huurdo pa e edificio aki, pero toch nan a dicidi di cuminsa cu e restauracion na spera cu den transcurso di e desaroyo di e proyecto lo por resulta un organisacion of compania cu lo desea di instala nan oficina den e area di centro na Playa. A pesar cu e area aki di caya principal y bisindario tin su reto, pero den e caso aki pa SMFA e prioridad ta e bienestar y conservacion di e bunita monumento aki.

E hecho cu nan ta cuminsa cu e trabou di restauracion di ex Botica Aruba, SMFA ta mira cu esaki lo por un efecto positivo, caminda eventualmente otro doñonan di edificio den e vecindario aki lo inverti den nan propiedad, ya sea cu ta monumental of no.

Nava a declara cu aña pasa den luna di april den cuadro di Dia Internacional di Monumentonan cu tabatin e tema di herencia rural, nan a adkiri Cas Tan Tin cu a haya su seyo di monumento proteha. Esaki ta e prome cas di Cunucu cu Stichting Monumenten Fonds ta agrega na su coleccion di monumento. E ta den man di fundacion Mi Cutisa, cu ta mantene bibo no solamente e historia di Cas Tan Tin, sino di e cas di cunucu en general.

Ley di proteccion.
Tambe nan tin un plan di mantencion pa garantisa e bon estado di nan edificionan monumental. Pero tambe pa atende inmediatamente cu caso di vandalismo cu a yega di sosode den pasado. E hende no ta consciente di e daño cu nan por causa riba un edificio monumental, ora cu nan ta pone graffiti ariba dje.

Den nos ley di proteccion di monumento ta existi straf den forma di multa pa esunnan cu ta causa daño contra nan. No ta trabou di SMFA pa realisa e tipo di control aki, sino di otro instancia di gobierno, manera Monumenten Bureau (MB) cu ta aplica e ley y te hasta por duna proces-verbaal contra hendenan cu ta atenta of causa daño na nos monumentonan. Lamentablemente den e tipo di delito aki, no ta facil pa haya e responsabel.

Contacto y subsidio.
Un aspecto cu PR di SMFA, Mircla Nava ta considera relevante ta cu e fundacion aki semper ta percura pa keda den contacto estrecho cu diferente organisacionnan den tereno di herencia cultural.

Aña pasa, directora di e fundacion Anne Witsenburg a bishita e Regional & International Conference na Bermuda. Eynan el a tene un presentacion tocante e trabounan cu SMFA ta bin realisando na Aruba, y con e fundacion aki ta funciona.

Tambe Sra. Witsenburg a haci bishitanan di trabou na Hulanda caminda a atende e Conferentie Nationale Erfgoed na Deventer. Durante e bishita aki el a tene contacto cu partnernan manera Nationaal Restauratie Fonds y Stichting Boey. Di e contactonan aki a sali e peticion pa SMFA organisa un paseo pa e Minister di Cultura di Hulanda, Sra. Ingrid van Engelshoven, durante su bishita na Aruba, aña pasa.

Danki na e impresion cu e mandatario aki a haya di e trabou cu SMFA ta bin realisando, y nan contactonan internacional, despues di basta aña ta existi e posibilidad cu nan lo por tin acceso na algun subsidio for di Hulanda. Nan ta spera cu pronto nan lo por anuncia un bon noticia riba e tereno aki.

PR di SMFA, Mircla Nava kende tur aña ta traha riba educacion y conscientisacion di nos muchanan di scol a bisa cu 2020 no lo ta un excepcion tampoco. Nan lo sigui trece mas informacion activamente cerca e alumnonan mas jong, tocante nos monumento y importancia di nan, como parti di nos herencia cultural.