Sr. Angelo Tromp a keda nombra como director interino di Museo Arkeologico Aruba (MAA)

Diabierna anochi hunto cu apertura di e prome exposicion internacional den Museo Arkeologico a tuma luga e acto di despedida di sra. Arminda Frankel-Ruiz, como directora di e museo aki. E lo traha te dia 1 di mei venidero. Den su reemplaso a keda nombra como director interino, sr. Angelo Tromp kende den pasado a yega di traha cu e instituto aki.

Minister di Cultura, sr. Otmar Oduber a laga sa cu sr. Tromp lo keda encarga di e museo pa un periodo di cinco luna ora cu lo wordo nombra e director oficial di MAA. Sr. Tromp ta gosa di tur aprecio y credibilidad pa keda nombra como proximo director permanente. “Mi ta sigur cu Angelo lo continua cu e bon trabou cu directora anterior a realisa”, el a bisa.

Ambtenaar cu experiencia

E mandatario a bisa cu un gran cantidad di hende a aplica pa e funcion aki, pero naturalmente e escogencia a bay na momento cu  nan a corda riba sr. Angelo Tromp. “Angelo ta un ambtenaar cu hopi aña di experiencia”, el a bisa.

Sr. Tromp a forma parti di e Team di Maneho di departamento di Cultura den pasado. E mandatario a declara cu e tin un relacion hopi di cerca cu sr. Tromp kende actualmente ta estableci na Hulanda realisando un tarea specifico. “Mi forbor deseo ta cu nos por convence Angelo. Den e caso aki tur su coleganan y henter e veld cu tin e momento aki trahando cu mi pa nos por convence pa e por keda akinan y carga e reto aki como director…”, Minister Oduber a bisa. 

Sr. Tromp tin su tarea na Hulanda cu e ta bin realisando pa tur loke ta cultura. E mandatario a laga sa cu sr. Tromp ta un persona clave na Hulanda pa habri porta den mundo cultura pe. Tambe e ta su representante pa hiba diferente combersacion y negociacion pa su ministerio.  Pa tal motibo el a haya e funcion di director di MAA temporalmente.  El a bisa cu e nombramento di sr. Tromp a cay den bon tera cerca e empleadonan di MAA, ya cu e ta un persona conoci den museo caba.

Proceso di incorporacion

Igualmente e mandatario a laga sa cu sr. Tromp ta parti di e proceso di incorporacion Museo Arkeologico bou e mesun dak di e fundacion encarga cu e maneho di cinco museo na Aruba. Esaki lo tuma luga dia 1 di juli venidero caminda MAA ta stop di existi como un departamento di gobierno, y e ta bay cay bou e Fundacion Museo Arubano (FMA) hunto cu Museo Historico y dos museo mas na San Nicolas.  

Minister Oduber a bisa cu empleadonan actual di MAA lo mantene nan status como empleado publico, ya esaki a keda palabra.  Mientras tur otro hende cu ta drenta den FMA ya caba lo wordo emplea a base di contracto  y  no como empleado publico.

Encuanto e status di e empleadonan di MAA,  minister Oduber a laga sa cu fei casi un aña pasa nan a bin hibando un negociacion  cu nan, y tambe pa splica nan e proceso cu ta wordo hiba di incorpora MAA bou e mesun dak di FMA. E mandatario a expresa cu e transicion lo tuma luga y e ta contento cu e director interino di MAA ta compronde e proceso aki.  Durante e lunanan venidero sr. Tromp como esun encarga di MAA ta reporta su mes cerca Minister di Cultura y despues fei 1 di juli, e mester reporta cerca MFA.  “Mi ta convenci cu dor cu nos a pone tur e museonan hunto un ta bay yuda otro den e desaroyo di profesionalisa  y bira ainda mas independiente  cada dia”, minister Oduber a bisa.