Sra. Annette Maduro ta e hende muhe di mas edad na Aruba

Sra. Annette Maduro ta e hende muhe di mas edad na Aruba. Dia 26 di mei proximo e ta bay celebra 107 aña cu poder di Dios. Sra. Maduro su aña di nacemento na 1909 ta coincidi cu un hecho historico cu a habri caminda pa e derechonan y igualdad di hende muhe.  E aña ey e partido Social di Estados Unidos a bin cu un declaracion dia 28 di februari pa celebra pa prome biaha Dia Nacional di Hende Muhe. Te aña 1913 nan a sigui celebra e fecha ey, durante e delaster diadomingo di februari.

Sra. Annette tabata un mucha muhe cu a wordo lanta na Mahuma. E tempo aya, Aruba no tabatin e desaroyo y facilidad di awendia y nan mester busca awa cu burico. Nan tabata piki e fruta di watapana y di aloe, y nan tabata cambia nan pa cuminda na Playa.

Annette su mama tabata Felipina Maduro y su tata William Hendrick Lampe. El a wordo lanta den un epoca cu no tabatin mucho perspectiva pa hende muhe. Cu 17 aña el a casa cu sr. Jean Hendrick Maduro durante un epoca cu e rol di hende muhe tabata wordo limita basicamente na esun di esposa y criansa di nan yiunan. Sra. Annette ta  mama di 15 yiunan y nan tur ta na bida.  E yiu mas grandi tin 88 aña y esun mas chikito 63 aña. E edad entre yiunan ta reparti asina: Cinco yiu ta entre 80 pa 90 aña; cinco mas ta entre 70 pa 80, y e cinco mas chikito ta entre 60 pa 70 aña.

Algo cu Sra. Annette ta gusta haci y cu tabata un ingrediente pa mantene su famia uni tabata cushinamento. Awor pa su edad halto e no ta haci’e mas, pero e tabata gusta cushina y hopi mes…  E ta un persona hopi religioso y e ta gusta resa hopi. Cu e fe Catolico aki el a lanta su yiunan como principio y fundeshi di nan structura y formacion como hendenan bon y drechi.

Na aña 1945 ora e Carta di Nacionnan Uni a wordo firma, Sra. Annette tabatin 36 aña.  E carta aki tabata e prome acuerdo internacional cu a afirma e  principio di igualdad entre hende muhe y hende homber. Pero te 1975 den cuadro di Aña Internacional di Hende Muhe, pa prome biaha Nacionnan Uni a celebra Dia Internacional di Hende Muhe riba 8 di maart.

Dia Internacional di Hende Muhe ta un fecha cu ta wordo celebra pa hopi pais rond mundo. Riba e fecha aki cu nos ta conmemora awe ta wordo refleha 107 aña di lucha pro igualdad, husticia y reconocimento riba e rol di ser femenino. E dia aki no ta referi unico y exclusivamente na hendenan muhe profesional of destaca. Sino cu e fecha aki ta dedica muy specialmente na e gran mayoria di hende muhe senciyo y trahado, manera Sra. Annette Maduro, kende ta protagonista di un historia cu mayoria di hende muhe ta skirbi tur dia cu nan trabou, dedicacion y bon ehempel, independiente di nan nacionalidad, lenga, grupo etnico, cultura, religion, etc.