Stichting Parkietenbos cu accion di firma pa dump y Ser’i Teishi

Ayera mainta, Stichting Parkietenbos a ofrece un conferencia di prensa pa medionan local pa duna di conoce e proximo accion cu lo haci pa loke ta trata stop di actividadnan na Ser’i Teishi, ademas di cera y sanea e dump Parkietenbos.

Edith Tromp, presidente di Stichting Parkietenbos, a splica cu desde 10 aña caba nan ta luchando pa cera y sanea. E solucionnan cu a busca pa un motibo of otro no a resulta y despues, di un forma iresponsabel a laga e dump Parkietenbos crece y lag’e bira un sero halto, cu awe constantemente ta causa molester y problema di salud pa e habitantenan di e barionan den e cercania.

E solucion cu a busca pa dera desperdicio, un proceso yama ‘Envirobale’ na Ser’i Teishi tampoco no a resulta. El a expresa cu e habitantenan di e bario cercano tin mas molester di holo malo y gasnan toxico. Nan a haya sa di varios caso di hende cu ta hopi malo cu alergia, asma, dolor di cabes y un cantidad di malestar cu e habitantenan di bario a soporta, sperando riba un solucion.

Tromp a manifesta cu awor e fundacion di e barionan ta organisando un accion di firma, pa forsa gobierno soluciona e problema grave cu ta afectando e barionan aki. Diadomingo 26 di januari proximo Stichting Parkietenbos ta invita habitantenan di e barionan Cas Paloma, Mahuma, Sero Biento, Balashi, Wayaca, Primavera, Buenavista, Simeon Antonio, Bucutiweg, Dakota y Tarabana pa un accion di firma pa pone un paro na e actividadnan na Ser’i Teishi y pa sanea dump Parkietenbos.

Tromp a informa cu lo cuminsa desde 9or di mainta te 2or di atardi. Riba internet tambe nan lo bay haci un accion pa haya apoyo di henter comunidad pa salba e barionan y comunidad di Aruba di mas problema ambiental.

Den varios potret presenta na prensa, Aldrich Croes, ken ta forma parti di e fundacion, a manifesta cu ta existi un fenomeno cu ta causando hopi molester pa e bario, esta kimamento di kabel di koper. Esey ta haci cu kimiconan hopi venenoso ta drenta den e bario.

Tambe, Croes a expresa cu taira ta wordo kima un bes pa luna y e huma cu ta inclui dioxine y otro kimiconan toxico cu tambe ta Sali for di e dump di Parkietenbos.

Di loke ta trata Ser’i Teishi, el a comenta cu a bin un solucion temporario pa dera envirobale cu ta wordo procesa pa Ecotech, despues pa Ecogas y finalmente Serlimar ta deposita nan na Ser’i Teishi. Esaki ta un solucion cu tabatin speransa cu lo resulta, sinembargo e situacion ta uno diferente.

E holo na Ser’i Teishi a bira constante, Croes a destaca y asina mes el a comenta cu ta un sufrimento enorme cu tur mainta e bario ta sufri.

Asina mes, Croes a laga sa cu e fundacion a reuni cu tur stakeholder, departamento di salud, Gobierno, Ecogas y Serlimar. El a enfatisa cu como miembro y habitantenan di barionan afecta a pasa un mal december, caminda holo malo y gas toxico a penetra nan cas pa dianan largo, y esey ta un situacion cu, despues di papia cu tur stakeholder, a dicidi di habri aña cu e paso di accion di firma pa forsa un solucion rapido.

Ademas, el a menciona cu nan ta consciente kico ta riba mesa. Tin e compania Ecogas cu ta ofrece pa saca e sushi for di Aruba y esey ta un hopi bon solucion, pero e ta un solucion temporal, pa motibo cu Aruba mes mester di un solucion final.

Tocante e responsabilidad di e problema aki, Croes a bisa cu e manera con e compania Serlimar a dera e envirobales no tabata esun miho. Por tin diferente componente di e problema, envirobale mes no ta un problema, pero si e ta dera malo si y esey a pasa den un aña. “Nos ta sigur cu loke nos ta hayando mainta y anochi ta tipo di gas manera methane y otronan”, Croes a afirma.

Gerry Giel, habitante di Buenavista, a duna di conoce cu e ta haya e efecto di e holo y huma toxico cu ta sali di Ser’i Teishi, cu ta esun mas dañino y cu ta afectando e bario ora cu e biento ta bin direccion nort west. “Bo no por disfruta bo cas ni por disfruta afo den weekend, semper bo mester ta paden, cera den cas”, Giel a bisa.

Steven Lacle, miembro di e fundacion, a splica cu tabatin diferente reunion cu gobierno anterior, cu gobierno actual y tambe cu Serlimar. Nan sa cu nan tabatin programanan riba mesa pa ehecuta, manera saneamento di dump, como incinerador of exportacion di sushi, pero te na e momentonan aki nada a sosode y nan ta wordo afecta malamente. “E momento a yega pa nos colecta firma y tuma nos pasonan pa haya atencion necesario, pa un accion di coreccion tuma luga”, Lacle a finalisa.