(AP) — Un keho pa abuso sexual a keda entrega contra strea pop di Puerto Rico, Ricky Martin, kende recientemente a demanda su sobrino pa loke el a bisa tabata acusacionnan falso di abuso sexual.

E keho a keda entrega riba diabierna na un comisaria di polis na capital di San Juan, segun vocero di polis, Edward Ramirez a bisa Associated Press riba diasabra. Informacion incluyendo ken a entrega e keho y detayenan di e acusacionnan no ta publico, pa motibo di e naturalesa di e keho.

Un persona kende no tabata autorisa pa papia tocante e caso a confirma cu sobrino di Martin, Dennis Yadiel Sanchez Martin, a entrega e keho. E persona a bisa cu e keho no ta duna impulso automaticamente na un aresto, pa motibo cu e supuesto incidente no ta recien, agregando cu polis ta bay investiga y determina si cargonan ta hustifica.

Sanchez anteriormente a solicita un orden di alehamento contra Martin na juli, pero un hues despues a archiva e caso despues cu Sanchez a admiti bao huramentacion cu e nunca a wordo abusa sexualmente pa e cantante.

Flavia Fernandez, un vocero di Martin, a bisa AP cu su team legal ta evaluando e situacion y no ta bay duna comentario publico pa awo.

Diahuebs ultimo, abogadonan di e artista a entrega un demanda contra su sobrino, kende nan a describi como “problematico”. Nan a acus’e di extorsion, persecucion malicioso, abuso di ley y daños.

Nan a bisa cu e acusacionnan di Sanchez a costa Martin al menos $10 miyon den contract y proyectonan cancela, ademas di otro $20 miyon den daño na su reputacion.

E demanda ta bisa cu Sanchez lo tabata manda hasta 10 mensahe pa dia na Martin, mayoria di nan “zundramento insignificante sin ningun proposito particular”. E demanda tambe ta acusa Sanchez di publica number priva di Martin, pa loke el a haya su mes forsa pa cambie.

Ademas, e demanda a bisa cu Sanchez falsamente a bisa cu e tabatin un relacion romantico cu Martin durante siete luna y cu e cantante no tabata kier pa termin’e y tabata yama Sanchez frecuentemente.

“Nada mas leu di e berdad”, e demanda a declara.

Abogadonan tambe a nota cu anteriormente, un hues a duna dos orden di alehamento contra Sanchez, den un caso di acoso separa.