E empresa Mericano Apache y Total di Francia a anuncia diamars pasa cu nan a logra un descubrimento “significativo” di petroleo y gas den awanan teritorial di Suriname, e prome hallazgo considerabel den e pais despues di varios aña di exploracion.
E pos Maka Central-1 den Bloque 58 a duna 240 pia di petroleo y 164 pia di condensado di petroleo y gas liviano na un profundidad bao awa di aproximadamente 3.280 pia, asina e socionan a bisa den un comunicado, agregando cu planificacion di evaluacion ya ta en marcha.
E Bloque 58 tin frontera cu e Bloque Stabroek di pais bisiña Guyana, unda un consorcio lidera pa ExxonMobil a realisa 15 descubrimento den cuatro aña y mey y luna pasa a bira e prome productor di petroleo di e pais na su campo Liza. Apache y Total, ta socio 50-50 den Bloque 58.
E socionan ta optimista tocante e descubrimento di Maka, cu ta den e mesun area cu e avalancha di hallazgo na bloque Stabroek di Guyana.
E hallazgo di Maka “ta calma e preocupacionnan principalmente tocante e hallazgo di condensado di gas, a base di e resultadonan di e pos Haimara di ExxonMobil na Guyana, cu ta bora casi na rand di Bloque 58,” e analista di Credit Suisse Bill Featherston a bisa den un nota di e inversionista aki, poco despues di e anuncio di Apache.
Maka Central-1 a produci resultado na dos profundidad, “Campanian” ta contene 164 pia di condensado netto di petroleo y gas liviano cu contenido di hidrocarburo cu gravedad API di 40-60 grado (material liviano;Red). Santonian tin 240 pia di deposito di petroleo, cu gravedad API di 35-45 grado, tambe crudo liviano.
For di esaki y otro detaye duna pa Apache y Total, Stephen Richardson, analista di Evercore ISI, a skirbi diamars pasa den un nota na inversionista, cu ta supone presencia di 300 miyon bari di petroleo recuperable.
