Fondo di seguro di malesa a yega di pasa den diferente desaroyo y cambionan den pasado cu a pone cu e fondo aki administra pa Banco di Seguro Social (SVb) a keda draai cu perdida cu ta wordo cubri dor di fia placa dor di otro fondonan.
E situacion aki ta trece cun’e cu e patrimonio di e fondo di seguro di malesa ta negativo. Aña pasa el a registra 100 miyon florin den cora. E situacion aki ta trece cun’e un riesgo pa financia publico ya cu -segun lei- pais Aruba ta para garantia pa e fondonan cu SVb ta maneha.
Durante e ultimo dianan a wordo teni reunion na Gobierno y Parlamento pa mira con lo por atende cu e fondo aki, ya cu riba su mes e no ta produci suficiente y e ta keda den deficit. Den combersacion cu Bon Dia Aruba, director di SVb, sr. Edwin Jacobs a bisa cu nan a haci un analisis pa wak kico ta e posibilidad pa nan por sanea e situacion financiero di e fondo, y ta basicamente dos parti: Aumenta e entrada cu ta nifica ya sea aumento di prima y/of aumento di e “premieloongrens”. E otro ta esun di baha e gastonan.
Baha gasto
Un pensamento eroneo cu sr. Jacobs a aclaria ta esun cu e fondo aki ta den problema debi na e cantidad di hende cu ta bay AO. El a indica cu locual nos tin riba indice di incapacidad cu e fondo ta compensa e ta bou 3%.
Na 2014 te hasta a wordo registra un tasa historicamente hopi abou y no solamente e aña aki tambe. Fei hopi aña caba e tasa di incapacidad cu ta wordo cubri pa e fondo ta bou 3%, segun sr. Jacobs.
“E ta nifica e ora cu pa bo baha gasto cu bo mester reduci e beneficio di asegurado”, segun sr. Jacobs. E ta mira cu e ehercicio aki ta hopi dificil pa haya sosten social pa esey. Pues pa parti di baha gasto, SVb no ta mira espacio pa saneamento di e fondo di malesa.
