Pa director di Banco di Seguro Social (SVb), Edwin Jacobs, 2017 lo bay den historia di e organisacion aki como ‘un aña un poco diferente’. Esaki den e sentido cu di un banda nan por papia di un exito, pero di otro banda nan no a yega na expectativanan cu nan a cuminsa e aña aki cu ne. Esaki lo por frena e desaroyonan cu nan ta desea y premira.

Pa loke ta e desaroyonan financiero di e fondonan cu SVb ta administra, e fondo di behes (AOV), segun sr. Jacobs e gastonan a aumenta e aña aki debi na e crecemento di e cantidad di pensionadonan. Pero tambe debi na e adaptacion cu a tuma luga na inicio di aña cu un 2.5%.

Na final di aña pasa e proyeccion di e crecemento economico tabata mas positivo. “Speransa tabata ta cu actividad di e refineria lo a cuminsa e aña aki y cu esey lo genera suficiente entrada pa por cubri e gastonan.” Nan ta mira cu e prima compara cu aña 2016 a aumenta un tiki mas cu un 5%. E expectativa tabata ta cu e por a crece mas pa motibo cu e refineria lo a habri. Pues esaki lo genera cu lo bin mas trahado acerca cu lo paga prima, pero na final esey no a tuma luga. Esaki ta pone cu ta premira cu e fondo di behes lo cera cu un deficit chikito. E deficit aki ta pone cu e plannan cu SVb tin pa crece e reserva y laga sigui evoluciona pa añanan 2020, e aña aki esaki no ta wordo realisa, segun sr. Jacobs.

Edwin Jacobs

Director di SVb a indica cu e situacion aki ta ilustra con importante crecemento economico ta pa e fondonan di siguridad social. Pa motibo cu si bo no tin disposicion di reservanan mas, esaki ta pone cu e fondo ta keda practicamente dependiente di crecemento economico.

E cifra di AOV a registra un crecemento minimo. Segun sr. Jacobs e recuperacion di e fondo ta andando tanto di e seguronan di malesa y AOV, aunke cu un tiki di contra tiempo e aña aki. “Pero positivo pa e recuperacion cu ta premira cu pa bay sigui.”

Seguro di malesa y accidente
Christian Garcia kende ta e funcionario encarga cu e parti di riesgonan di SVb, a elabora riba e fondo di seguro di malesa y accidente. E aña aki nan a introduci e boet administrativo cu ta reforsa e ley social pa asina tur dunadonan di trabou por cumpli cu loke e ley mes ta prescribi.

Tambe nan ta trahando conhuntamente cu DIMAS, cual a produci un efecto di crecemento di companianan cu ta registrando y tambe un aumento den e cantidad di aseguradonan. Den e 11 lunanan cu a pasa caba di 2017, a wordo registra un aumento di 9.800 asegurado cu a bin acerca den nan fondo.

E crecemento aki logicamente tin su efecto riba e gastonan di SVb, ya cu e aumento di cantidad di asegurado ta trece cu ne un aumento riba e compensacion di AO. Sinembargo e aumento aki ta manera nan a pronostica, y te luna di november e ta canando segun nan pronostico. Nan ta mira cu aña 2017 ta bay cera di un forma positivo. E ta haya cu tur cos ta canando conforme e plan di saneamento di e fondo aki.

Si nan ta compara cu 2016 tabatin un debe ainda di 19 miyon florin, y pa e mesun periodo aworaki di 2017, e debe a baha te 17 miyon y esaki ta conforme nan plan di saneamento. Un factor cu a yuda den esaki ta e proyecto di digitalisacion cu ta facilita pa tur doño di trabou por haci e tipo di proceso aki mas diligente.

Entrada te cu awor a base di volumen cu nan a saca di 2017, nan ta logra ricibi den entrada un 90 porciento, cual ta un porcentahe basta halto. Pero ainda pa december ta falta un entrada pa ricibi prome cu fin di luna. Probablemente pa 2017, SVb ta cera cu un surplus minimo pa e fondo di seguro y accidente, locual ta un reserva pa e añanan nos dilanti pa cubri e gastonan cu ta pendiente pa tercera parti. Esaki ta e gasto pendiente di companianan cu no a cobra di debe di e fondo di malesa y accidente.

Organisacion
Sr. Jacobs a bisa cu aña aki a bira un aña exitoso riba diferente aspecto organisatorio. Nan a cuminsa cu e proceso di transformacion di SVb for di un organisacion burocratico y tradicional pa uno moderno y digital pa final di aña 2020.

E aña aki, nan a cuminsa implementa algun proceso digital caba cu te aworaki ainda ta chikito, ‘pero solido y contundente’, pa yega na e organisacion moderno cu nan mester yega pa sigui sirbi comunidad, segun sr. Jacobs. Pero tambe pa nan por cumpli como organisacion cu e expectativanan di nan clientenan.

Nan a digitalisa diferente servicio cu a wordo introduci aña pasa, pero e aña aki nan a wordo mehora. Di su banda sr. Garcia a bisa cu un logro riba e tereno aki tabata e inscripcion di empleadonan den forma digital. E doñonan di trabou a cuminsa adapta su mes con e sistema ta funciona y nan ta hayando mas interes. Esaki mirando cu via e forma aki ta mas facil pa nan y pa nan empleadonan.

For di SVb a introduci e proceso aki te hasta luna pasa, un 20 porciento di e inscripcion den e periodo aki a bay den forma digital. El a bisa cu ya caba nan ta premira cu pa 2018 e uzo di e sistema aki lo incrementa hopi mas ainda. Nan meta ta pa yega na un 50 porciento of mas di inscripcion haci den forma digital.

Banda di esey SVb tin e servicio digital pa inscripcion di pension. E pensionadonan ta haci peticion pa aplica den forma digital pa su pensioen. Esaki ta facilita cu e pensionadonan no mester bin personalmente te cu oficina di SVb cu ta atende cu pensioen, sino cu e por haci su peticion via website di SVb.

Tambe nan tin otro servicio cu nan a hinca den nan sistema digital como e notificacion di AO. Sr. Garcia a declara na Bon Dia Aruba cu hopi compania tabatin mester di e facilidad di e tipo di servicio aki, mirando cu via SVb su linea nan di telefon ta hopi ocupa. “Esey a duna un alivio na nos trahadonan di SVb, pasobra e ta drenta di un forma mas facil tambe”, el a bisa.

El a menciona tambe cu e servicio digital pa loke ta trata declaracionnan cu nan ta duna e trahadonan y companianan pa nan por haci uzo di tramitenan cu DIMAS. Na luna di mei ultimo SVb a introduci e sistema aki y ya caba pa cera aña 2017, un 80 porciento di tur e peticion aki ta tumando luga den forma digital. E ta haya cu e ta trece alivio riba nan servicio, ya cu e ta un servicio mas pro activo, pasobra den un dia nan por cumpli cu nan cliente.

“Nos ta mustra cu nos ta canando den e bon caminda pa loke ta e digitalisacion di tur nos servicionan”, segun e funcionario di SVb, sr. Garcia.