‘Ta bay ofrece muchanan di Proyecto Scol Multi Lingual un Colegio Toets na Papiamento?’

Fuente: www.oesd.noaa.gov 
E prome grupo cu a cumpli 8 aña di educacion cu e projecto piloto di Scol Multi Lingual lo gradua di zesde klas e aña aki. E ultimo dos aña Ex-Minister di Enseñansa a interveni na tur sorto di manera pa tene e cantidad di alumno cu por bay Colegio na 15%, door di baha e exigencianan stipula pa Colegio. Aña pasa a ‘overrule’ e resultadonan di Colegio y Minister a laga muchanan cu a scoor un 4 tambe pa Hulandes bay Colegio. Ora un mucha tende despues di tempo cu e mester baha y bay e nivel di Mavo, no ta agradabel y esey tampoco no ta bin den noticia mas. E pregunta ta, si lo ta necesario pa ofrece un Colegio Toets na Papiamento tambe awor?
Pakico Projecto Scol Multi Lingual (PMSL)
Na 2010 durante un actividad organisa pa IPA y Universidad di Aruba, dos profesor di Puerto Rico (Faraclas y De Jesus) a duna charla tocante Multi Lingual Education (MLE), y comparti Best Practices di Puerto Rico. Aunque e situacion na Aruba no ta mescos, e reto no ta hopi diferente. Na Aruba nos tin e situacion extra ordinario cu examens na Hulandes y estudionan afo. Dos aña consecutivamente a cambia e procedura y baha e  drempel pa por drenta Colegio Arubano. E aña aki tawata tin 32 alumno (8%) cu a wordo manda bek pa Mavo despues di un of dos aña na Colegio Arubano. Resultadonan di examen ta keda tras compara cu otro paisnan den Reino y den Caribe y e cantidad di alumno cu ta drop out ta alarmante. Inovacion di nos sistema di educacion ta hopi necesario. Projecto Scol Multilingual lo ta un di e solucionnan, si e wordo implementa bon. Implementacion ta inclui fondonan pa recapacitacion, pa mas ayudo den klas den e forma di assistent, pa evaluacion.
Implementacion di PSML
Un di e problemanan mas grandi cu inovacion den Enseñansa, ta evaluacion. Un bon idea y tremendo plan pa mehora educacion, tin su plan di strategia pa cu implementacion bon structura y lo mester tin e sosten di esnan cu lo mester haci e trabou. Un projecto asina lo mester wordo bon evalua y asesa continuamente y debidamente. Transparencia ta e yabi pa habri e porta di exito. Pa e motibo ey e noticia di nos Minister di Educacion, Mr. Armando Lampe, tawata e hot topic na Aruba siman pasa. Specialmente bou mayornan y maestronan. Un biaha mas, e idea ta bon, e projecto SML ta uno cu tin un base scientifico y cu ta cumpli cu e articulonan den e Tratado di Derechonan Internacional di Mucha (1989). Tambe e ta cumpli cu e Metanan di Desaroyo Sostenibel di UNESCO te cu 2030. Sinembargo e miho resultado semper ta wordo logra door di scucha tur esnan envolvi y/o afecta pa cu un decision grandi asina. Un ‘top down executive decision’ por traha solamente si ta involvi y informa esnan cu ta wordo afecta debidamente.
Censo 2010
Cifranan di Censo (2010) di CBS ta mustra cu e idioma Papiamento (66%), ta wordo papia mas cu cualkier otro idioma na cas. Instruccion na Papiamento lo laga e participacion di mayor tambe crece y a lo largo e mucha lo ta mas exitoso. Sinembargo, esaki no ta kita e derecho di personanan y institutonan pa nan mes bin cu nan propio filosofía y scoge pa ofrece Hulandes, Ingles, Spaño, Frances, Creole, Chines of cualkier otro idioma como idioma di instrucion. Mas importante ainda, ta si tin material adecua na Scol secondario tambe, pa e mucha por continua su estudio na e manera mas efectivo.
Derechonan Internacional di  Mucha
Den e Tratado di Derecho di Mucha (1989) firma pa Hulanda na 1995, na articulonan 28 y 29 tin stipula, entre otro, pa educacion primario mester ta gratis y pa un mucha por eherce su cultura y idioma. Ademas pa Gobierno percura pa tin variacion di nivel di scol secondario y cu un educacion academico ta keda accesibel. Investigacionnan di UNESCO tambe a demonstra cu educacion den e lenga materno ta duna mayoria mucha e miho oportunidad pa ta exitoso na scol. Despues di siña conceptonan importante y un vocabulario den su lenga materno e transfer pa cualkier otro idioma lo ta hopi mas facil.

Mireille Sint Jago (UPP)
UNESCO
Educacion den lenga materno y educacion multilingual (MLE) ta e ‘Sustainable Development Goal’ (SDG) #4 di UNESCO. Cu e base aki, referiendo na UNESCO, cu tin como meta pa tur pais hunto por Transforma Mundo mundo atravez di 17 Sustainable Development Goals (SDG’s) entre 2015 y 2030, e meta aki por wordo logra. Pero ban keda vigila e proceso di implementacion na un manera critico, pasobra un tremendo plan di innovacion por bira un desaster cu un mal implementacion! Nos tur kico ta pasa ora un sopi wordo traha den pura.
Pa es motibo nos di UPP kier a comparti precupacionnan cu a yega cerca nos tocante e Colegio Toets. Pasobra si strobe ta scohea baha e exigencianan di admicion, institui last minute comisionnan pa kita e poder di SMOA y pa tapa pa mal maneho den Enseñansa pa gana reconocemento politico, atrobe ta e mucha ta esun cu lo sufri. Aruba, den mi opinion, no mester di un Minister cu kier demonstra su curashi y bon intencion como politico cu un anuncio y fecha bunita. Locual nos tin mester y tin derecho pa haya sa, ta ki resultadonan a sali di a test di PSML y si e aña aki si e Colegio toets lo wordo ofrece den e idioma Papiamento tambe, pa asina preveni cu un resultado di un test ta wordo ‘overruled’ door di un Minister.

You May Also Like

‘Gobierno nobo ta trahando pa yega na trankilidad y normalidad entre Aruba y Venezuela’

Durante conferencia di prensa di Gobierno di Aruba, minister Xiomara RuizMaduro a splica riba ...

‘Minister mester bin parlamento pa splica su plan di maneho financiero’

“Lo tabata hopi mas elegante si minister di Financia a bin parlamento den un ...

Mike de Meza (AVP): Gobierno kier pone alrededor di 20 miyon florin riba lomba di RdA

ORANJESTAD – Dilanti compania estatal di pais Aruba, Refineria di Aruba ( RdA ) ...

‘Evelyn ta vrij cu Otmar pa forma gobierno y Xiomara ta insisti cu mester condena Otmar’

Proceso pa formacion di un gobierno di coalicion nobo ta continuando pero na mes ...