‘Tecnologia por stimula nos crecemento economico’

Siman pasa durante conferencia di tecnologia y innovacion Atech por a mira diferente startups y companianan cu potencial pa crece y cu ideanan nobo.
E companianan aki hopi biaha ta bin cu ideanan nobo, specialmente uzande tecnologia como un strategia clave pa trece cambio den e espacionan cu nan kier desaroya. Esaki den Ingles nan ta yama disruptiveness, cual ta un concepto unda e companianan kier trece cambionan grandi den e industria cu nan ta opera.

Un ehempel di esaki ta e asina yama fintech companies. Ta trata aki di companianan den sector di servicionan financiero cu ta uza tecnologianan manera Blockchain pa shake up e industria financiero.

Pero frecuentemente e startups nan aki tin mester di un ayudo special pa por crece den e compania cu nan lo kier bira. Esaki ta pasobra nan ta nace di un idea principal pa medio di un necesidad of algo otro cu e persona cu e idea a nota cu ta haci falta. Den e ehempel cu Adam Powolsky, orado durante e conferencia di innovacion, a duna nos, esaki tabata un persona cu a experiencia cu e como hende muhe y ingeniero no ta mira caranan femenino eherciendo trabounan di ingeniero.

Pues hopi biaha startups ta nace di un necesidad y urgencia pa purba trece cambio den cualkier area cu nan lo kier opera. Sinembargo e no ta facil pa por cuminsa cu un startup. Tin hopi facetanan cu ta envolvi y mirando cu frecuentemente Millennials ta esnan cu ta cuminsa cu startups, manera sr. Powolsky a menciona den nos ultimo edicion, ta posibel cu nan no tin e conocemento necesario pa ehecuta nan idea completamente.

Programa special pa startups
Pero tambe tin luganan unda startups por bay pa asina haya ayudo, financiamento y conseho cu proceso di cuminsa un compania. Durante Atech nos a combersa cu Axel de Vries, kende ta manager of performance improvement na compania di consultancy EY. Sr. de Vries ta conta nos cu e ta encarga cu yuda companianan y tambe startups cu e retonan cu nan ta enfrenta en general, pero te hasta cu financiamento di proyecto of di e compania mes.

T’asina cu nan tin un programa specifico pa yuda startups haya financiamento. “Si nos ta kere den e entrepeneur y nos ta mira cu tin hopi potencial den nan idea, nos por brinda nos conocemento como compania. Nos no ta haci solamente consultancy pero tambe accountancy y conseho pa lidia cu impuesto. Pero tambe den e parti administrativo nos por yuda, dependiendo di loke e entrepeneur mester.”

Sr. de Vries ta sigui conta cu den su experiencia companianan ta haya nan mes enfrenta cu retonan specialmente ora nan mester crece, ora falta fondo pa realisa un idea nobo pero te hasta ora nan tin un idea pero nan no sa con pa haci ehecuta esaki den un modelo pa crea ganashi.

E motivacion cu un compania grandi manera EY tin pa cuminsa cu un programa specialmente pa compania chikito y startups, ta cu huntamento e companianan aki lo bira e companianan grandi di futuro, segun sr. de Vries.

“Mi ta kere ora companianan grandi, gobierno y startups colabora hunto nos por conhuntamente fomenta mas innovacion riba e isla.”

Un otro rason cu EY kier inverti den e comunidad di startups na Aruba specialmente, segun sr. de Vries, ta pasobra nan ta considera Aruba como un mercado cu hopi potencial pa crece. “Pero p’ami personalmente e ta algo cu mi kier haci pa ta mas envolvi cu e comunidad aki na Aruba.”

Yuda hobennan cuminsa cu nan mes compania
Cu esaki sr. de Vries ta referi na e echo cu ‘hobennan no kier drenta companianan grandi. Nan kier cuminsa cu nan mesun companianan’. “Mi kier envolvi mi mes mas pa pasa e conocemento cu e compania tin na generacionnan nobo.”

Ya caba tin interes di parti di instancianan paden y pafo di gobierno pa loke ta trata innovacion, segun sr. de Vries. “Esaki bo por mira por ehempel cu e Bureau Innovacion di gobierno, Elmar cu nan zonnepanelen y te hasta e Banco Central ta interesa pa mira e potencial di companianan fintech pa Aruba.”

Pa loke ta trata e banda mas personal di loke sr. de Vries a keda cu ne despues di Atech, e ta conta nos cu e ta haya e spirito di startups asombroso. “Tin biaha nan tin ideanan cu por berdaderamente cambia mundo, pero tambe por tin idea cu bo ta pensa, dicon esey no tabata existi antes? Pero e ta inspira mi con hopi e hendenan cu ta tras di un startup ta kere asina hopi den nan idea y kier haci nan startup exitoso.”

Sr. de Vries a finalisa bisando cu ‘tecnologia tin e potencial pa stimula nos crecemento economico riba Aruba y tambe pa crece na nivel mundial’.

Hoben Curasoleño inspira pa sigui desaroya negoshinan
Naser Mercelina, un hoben Curasoleño di 25 aña di edad, studiando na Universidad di Corsou, ta conta Bon Dia cu el a haya interes pa bin na Atech pasobra e tabata buscando un sosiego di su estudio pero alabes algo cual e lo por siña di dje.

“Mi a haya sa di Atech y mi a haya interesante cu tabatin asina hopi cos cu bo por siña na un evento manera esaki, specialmente pasobra mi mes tin un compania den mi pais y mi kier haya inspiracion.” Sr. Mercelina a splica cu el a haya sa hopi di tecnologianan nobo cu tin pa medio di e charlanan duna durante Atech. Sinembargo tambe e aspecto di motivacion cu e oradonan a trece dilanti.

“Ora mi bay bek Corsou mi lo keda masha inspira pa e evento aki. Pa loke ta trata mi mesun negoshinan specialmente, mi a haya un kick pa sigui desaroya mi mes y tambe mi negoshinan. Esey mi lo bay bek cu ne di e experiencia aki.”

 

You May Also Like

Actualmente tin un trahado social pa 19 scol

Parlamentario Hendrik Tevreden a expresa su preocupacion y su solidaridad cu henter comunidad cu ...

Delegacion di Manaure a bin busca mecanismo di cooperacion cu Aruba

ORANJESTAD – For di municipio di Manaure, parti nort di departamento di Guajira na ...

16-11-16canddelatarabana (1).JPG

Auto a pega candela den careda pazuid di rotonde Tarabana

Diamars pasa di 11:30  anochi den Dadelstraat pazuid di e rotonde na Tarabana un ...

Investigacion di e morto di Mitch Henriquez a keda cla

Update: abogado ta bisa a base di rapport riba e investigacion di Rijksrecherche, cu ...

Implementacion scol multilingual ta cuminsa na 2018

Otro aña gobierno ta cuminsa cu e introduccion di e scol multilingual. Esaki ta ...

Brug na Amsterdam ta haya nomber di Boy Ecury

Recientemente Gemeente Amsterdam a nombra 15 brug pa es motibo cu te ainda nan ...