Despues di un proceso di formacion di gobierno cu a cuminza parce e proceso ‘normal’ Hulandes di mas di seis luna pa yega na un coalicion, awor ainda no a yega un fin na e falta di claridad riba un cantidad di asunto clave. Nos tin un gobierno nobo cu inmediatamente a haya critica pasobra un parti importante di e gabinete no t’ey pa traha. Esey di un banda ta facil pa splica; si tin un compromiso cu Reino pa bay Nacionnan Uni, ta esey ta loke nos Promer Ministro mester haci. Otro cos ta cu simultaneamente e vice promer ministro tambe ta ausente, loke no tin logica. Argumento cu mester bay cu vacacion pa tuma un ‘rosea’ promer cu trabao ministerial cuminza, no ta parce tanto al caso.

Pero esey no ta e aspectonan cu realmente ta marca e situacion den cual nos ta actualmente. Tur gobierno den nan inicio tin nan momentonan ‘akward’ na inicio, esey no ta esencial. Sin embargo, ta keda varios asunto cu si ta yama nos atencion y preocupacion. Diabierna pasa a cay e decision den Conseho di Ministro di Reino cu Aruba no ta haya e siguiente transaccion di placa di subsidio di liquidez, y a menciona varios asunto den e decision di e Conseho cu ta relaciona cu e decision ey. Di su banda gobierno di Aruba a enfoca riba e asunto di e 60 miyon florin di austerisacion den gasto di AZV cu mester a tuma luigar, unda a laga Hulanda sa cu Aruba no lo bay cumpli cu esaki. E impresion duna ta cu ta esaki tabata e trasfondo di e decision di e Conseho di Ministro. Sin embargo, tirando un vista riba e ‘Besluitenlijst’ di Gobierno di Reino di siman pasa, no ta menciona e asunto di AZV. Loke si ta menciona ta entre otro e asunto di e plan pa reforma di e aparato gubernamental (BVP), cu no a haya ehecucion manera tabata palabra. Concretamente no tabata trata solamente di limitacion di gasto total manera e acuerdo tabata menciona, pero lo tabata normal cu a haci avance tambe cu e cambionan structural cu ta necesario pa logra mehora un situacion faborable mas a largo plazo. Manera nos mes por a nota, no tin nada cu ta mustra riba un adelanto den e situacion ey.

Ademas esaki no ta e unico punto di preocupacion, cu lo mester ta di preocupacion na nos banda tambe. Den e documento acompañante di e besluitenlijst di Conseho di Ministro di Reino ta duna mas informacion tocante e trasfondo di e pensamento Hulandes a base di cual ta yega na e paro momentaneo di e ayudo financiero. Ta considera cu Aruba pa basta tempo caba tin un structura economico vulnerable unda su economia apenas a crece den ultimo 10 aña. E situacion di Covid-19 a bin empeora solamente e situacion ey. Ta recorda cu na 2019 caba e debe publico tabata na 84% di nos GDP, loke ta leu riba e limite critico di 55% cu IMF ta recomenda, y pa fin di 2021 esaki lo ta na 130,3%. Y e preocupacion ta cu e fecha pa dicidi si Aruba lo haya posibilidad pa refinancia e prestamo Hulandes bao condicion faborable ta na april 2022, y cu e evaluacion mester cuminza 6 luna antes…, cu ta awor… Y ta enfatiza cu no ta trata di e riesgonan financiero riba nan mes, pero e hecho cu no ta trahando riba e reformanan necesario pa garantiza un situacion mas stabil. Segun nos gobierno pasobra nan tabatin otro problema pa atende, e proceso di consulta pa forma gobierno, pero esey ta resultando mas y mas loke nos tabata argumenta caba: un ‘delayed tactics’, tactica di retrasa decisionnan importante, cu e argumento cu no tin tempo pa esey pasobra mester a papia cu ‘cacho y pushi’ den un proceso di consulta nunca visto na Aruba. Mester reconoce cu un consulta amplio tin su beneficionan tambe. Ningun hende lo por bisa despues cu no a scucha tur organisacion di algun peso, y gobierno no por bisa hamas cu nan no tabata na altura di e situacion den tur aspecto. E pregunta cu ta surgi awor ta esaki: a forma gobierno a base di ideanan superficial, si ta awor no mas e ministronan ta bay duna contenido na nan maneho? O tin un maneho pero no ta divulga esey ainda, o no tin un maneho ainda y ta bay tuma mas cu un luna pa divulga un plan di gobernacion…? Di dos cos ta un so ta berdad.

Nos por a ripara caba den ultimo lunanan cu nos mandatarionan no ta ni toca e temanan cu ta poni den e ‘Uitvoeringsagenda’ como algo cu a palabra caba, di ambos banda. E preocupacion Hulandes lo ta cu, mientras mester cuminza papia di con ta bay sigui a mas largo plazo, e tacticanan di retraso ta haci cu no tin ningun claridad riba e medidanan, banda esunnan meramente financiero, pa crea un base mas solido socio-economico pa despues. E problema ta keda cu e trasfondo di ‘delay tactics’ ta e temor electoral, cu ta haci cu no ta ni papia mes di e cosnan impopular cu mester sucede. Y ta net esey e Hulandesnan no tin problema cune, al contrario. En todo caso, e tempo pa keda pospone a parce di a caba.

LEAVE A REPLY

Please enter your comment!
Please enter your name here