Administracion di Trump a duna un golpi final na presidente Venezolano, Nicolas Maduro, anunciando ayera un ronda nobo di sancionnan financiero pisa, cu ta enfoca riba un red acusa di move petroleo den nomber di e supuesto frontman di e presidente.
Departamento di Tesoro Mericano a impone medida financiero riba tres individuo, diescuatro entidad comercial y seis barco. Nan ta acusa di asisti Pdvsa, bao control di Maduro, pa maniobra evitando sancionnan anterior di Merca diseña pa stop e presidente di genera ganashi di benta di crudo.
Trump, ken lo bandona Cas Blanco awe, a lidera un coalicion internacional den ultimo dos aña aumentando presion riba Maduro pa termina loke oficialnan Mericano ta yama su gara ilegitimo riba poder.
Cas Blanco ta reconoce lider di oposicion Venezolano, Juan Guaido, como e lider legitimo di e nacion, culpando Maduro pa e ruina politico y economico di Venezuela.
E sancionnan nobo ta enfoca riba persona y negoshinan vincula na Alex Saab, un comerciante Colombiano kende oficialnan Mericano ta bisa ta un socio cercano di Maduro. Saab ta cera na Cape Verde mientras ta bringa extradicion na Merca pa enfrenta acusacion di corupcion.
E figuranan principal riba ken e sancionnan ta enfoca ta Alessandro Bazzoni, Francisco Javier D’Agostino Casado, Philipp Paul Vartan Apikian, Elemento Ltd., y Swissoil Trading SA.
Sancionnan di Oficina pa Control di Bienes Stranhero di Departamento di Tesoro ta blokea cualkier propiedad cu e individuonan y negoshinan tin den hurisdiccionnan Mericano, y ta prohibi Mericanonan di conduci transaccionnan financiero cu nan.
Departamento di Comercio Mericano tambe a anuncia medidanan diamars pa blokea tecnologia Mericano di ser usa pa inteligencia militar den nacionnan incluyendo China, Cuba, Rusia y Venezuela.
Oficialnan di Comercio a bisa den un declaracion cu na Venezuela nan ta busca di priva e Directorado General di Contrainteligencia Militar di cualkier tecnologia Mericano. Gruponan di derechonan humano ta acusa e agencia di contrainteligencia di abuso contra su propio ciudadanonan, incluyendo tortura.
