Diasabra Donald Trump a priminti pa reduci “considerablemente” e costo di e muraya cu e kier construi na frontera cu Mexico y cu ta calcula na 12 mil miyon dollar.
“Mi no a traha ainda riba diseño y negociacion. Ora cu mi logra esey, anto Prius mester bay abao “considerablemente”, manera mi ta haci cu avion di combate F-35 y e programa Air Force One.” Trump ta un homber cu hopi experencia como empresario y danki na esey el a logra un miho prijs pa su avion di combate furtivo y pa cumpra un Boeing pa ser usa pa construccion di e avion presidencial.
Donald Trump a duna un reaccion despues cu experto a duna informacion tocante e costo di muraya di alrededor di 3.200 kilometer di frontera cu Mexico, y cu por tin un costo mayor di 20 miyon dollar. Durante campaña Donald Trump a calcula cu construccion di e muraya por tin un costo entre 8 mil y 12 mil miyon dollar.
Revista di MIT a publica den un articulo den luna di october cu e placa cu lo ser emplea pa construccion di e muraya por bira mas ainda, te 40 mil miyon dollar. Trump a firma un decreto dia 25 di januari, caminda el a dicidi riba e construccion di e muraya. Presidente di Merca a bisa na diferente ocasion cu su intencion ta cu Mexico mester por paga e obra aki, pero gobierno di Mexico a rechasa e proyecto di Trump.
Marcha na frontera
Mas di 20 mil persona a marcha ayera na ciudad di Mexico pa protesta contra Donald Trump y su proyecto di construccion di un muraya na frontera cu Merca. E marcha a sucede den un ambiente di crisis diplomatico cu awor ta reina entre Mexico y Merca.
E marcha no ta contra Merca, ni contra pueblo Mericano” Enrique Krauza, historiador Mexicano a bisa. “E ta un marcha contra cos absurdo, inhusto y abuso cu tur famia y pueblo Mexicano en general ta experimenta na Merca.”
Ta un marcha senciyo y modesto compara cu acto politico o festival di rock cu ta haya mas di 150.000 hende. E manifestacion a tuma lugar na capital di Mexico y otro binti ciudad di e pais aki. Tabatin hopi pancarta cu frase manera “menos muraya, mas amor”, “#Ban Trump” y “nos mester enfrenta e tirano” skirbi riba un borchi, caminda cu Trump tabata aparece cu un bigoti manera Hitler.
E marcha a ser convoca pa mas di 80 organisacion civil y di empresario, grupo di manifestante “Vibra Mexico” y “Mexicano uni”. Tur hende a bishita e monumento di Angel na ciudad di Mexico, y ey nan a canta himno nacional. Hopi manifestante a cana cu paña blanco y algun di nan tabatin bandera Mexicano na blanco y preto manera un simbolo di luto.
