Lagando un banda preocupacion di instabilidad economico global, Presidente Mericano, Donald Trump ayera a defende e manera con e ta purbando di logra un acuerdo cu China, bisando cu ta e manera cu a traha p’e den negoshi.
Trump a wordo reta pa e estilo di negocia, den cual e ta elogia Presidente Chines, Xi Jinping, un dia, y e proximo ta dun’e castigo. Aliadonan ta kehando cu esey ta contribui na problema cu instabilidad pa nan y otro nacion, segun un pregunta durante un conferencia di prensa cerando e participacion di Trump den cumbre G7. “Sorry, asina mi ta haci negoshi”, Trump a contesta.
Bou presion pa un negociacion sin fruto, Trump a bisa cu su negociantenan di comercio a ricibi ‘dos hopi bon’ yamada di China – segun Trump, un señal cu China ta serio pa logra un acuerdo comercial. “Nos ta kere nos ta bay yega acuerdo, awo nos ta tratando termino adecua. Nan ta compronde y nos ta compronde”, Trump a bisa.
Sinembargo, Vocero di Ministerio di Exterior di China, Geng Shuang a bisa cu e ‘no a tende di e yamadanan menciona pa Merca’.
Trump tambe a bisa cu ta prome biaha cu e ta wak cu nan kier tin un acuerdo y ta kere esey ta un stap positivo.
Presidente Frances, Emmanuel Macron, anfitrion di e cumbre cu a compaña Trump na e conferencia di prensa, a bisa cu e situacion a crea incertidumbre economico y a urgi ambos banda pa yega na un acuerdo. “Locual ta malo pa economia global ta incertidumbre”, Macron a bisa, papiando na Ingles. “Mas pronto yega na un acuerdo, mas pronto incertidumbre lo caba.”
