Tiramento na un club nocturno na Connecticut a laga un persona morto y varios herido, segun polis a informa ayera trempan.

Informacion preliminar ta indica cu dos homber y dos muhe a resulta herida den e tiramento, segun teniente Paul Cicero di polis di Hartford a bisa AP. E fatalidad tabata un homber di 28 aña di edad, segun polis di Hartford a informa riba Twitter.

Dos di e heridonan tabata den cirugia pa 7:30am mientras e otro dos tabata ‘stabiel’. Nan condicion exacto y e gravedad di nan herida no a ser revela. Tampoco a revela ningun nomber.

Cicero a confirma cu e tiramento a tuma luga paden di Majestic Lounge, ubica den bario South End di Harftord. Un yamada na e number riba pagina di Facebook di Majestic Lounge no a ricibi contesta.

Mas detaye, incluyendo informacion di e tirado, no tabata inmediatamente disponibel. Polis a cera algun caya den un radio di un cuadra rond di e club pa algun tempo.

Cicero a bisa alrededor di 7am cu polis a caba di bandona e escena, memey di un ‘investigacion largo y compleho’.

“Nos no ta bay tin nada pa algun tempo”, el a bisa.