Union Europeo ta baha Aruba for di lista preto

ORANJESTAD – Recientemente Aruba a wordo poni riba lista preto di EU debi cu algun cambio den nos leynan no a keda efectua prome cu 1 di januari 2019. E cambionan necesario a keda pasa na april den parlamento di Aruba y cu esaki awor Aruba ta cla pa wordo baha for di e lista preto di Union Europeo.

Na aña 2015 riba regimen fiscal Union Europeo siguiendo e pasonan di e Organisacion pa Cooperacion y Desaroyo Economico OECD a haci un investigacion, cu por ta causa di daño y competencia inhusto entre paisnan miembro di e organisacion. Den e investigacion aki a sali na cla cu 3 regimen na Aruba ta wordo considera como competencia inhusto y no ta cuadra cu e reglanan di OECD. Ta trata aki di e San Nicolas Regime, e patentbox di e IPC regime nobo y e Vehiculo Transparente. Gobierno di Aruba a wordo acerca pa EU pa por haci e cambionan necesario, ya cu si no cumpli cu e reglanan nos Pais lo bay riba e lista preto di Paisnan cu ta permiti pa negoshi paga hopi menos of keda sin paga impuesto.

Gobierno a logra elimina e patentbox di e IPC regime nobo entrante 18 di october 2017 y a eboli e San Nicolas Regime na october 2018 conforme acuerdo cu EU, pero no a logra keda na cla na ora cu e cambionan na e Vehiculo Transparente prome cu e deadline di 1 di januari 2019. Pa e motibo aki, na maart EU a dicidi di pone Aruba riba nan lista preto di paisnan cu no ta coopera cu un sistema fiscal husto.

Dia 4 di april 2019 e cambionan necesario den e leynan ‘Algemene Landsverordening Belastingen’ y e ‘Landsverordening winstbelasting’ a keda aproba pa parlamento y dia 10 di april e ‘Landsbesluit aanwijzing reële economische aanwezigheid transparante vennootschap’ tambe a keda decreta. Cu e cambio di e leynan aki y e decreto, Aruba a cumpli cu e cambionan necesario y a manda esaki mesora pa EU pa por cuminsa e ‘delisting process’ pa por wordo baha for di e lista preto.

For di EU a ricibi notificacion cu e Ley y e Decreto ta ‘EU compliant’ y p’esey dia 17 di mei proximo durante e reunion di Minister di Financia di EU, Aruba por wordo baha fo’i e lista preto y por figura atrobe entre e Paisnan cu tin un sistema fiscal cu no ta fomenta un concurencia cu ta inhusto.

 

You May Also Like

Celebrando e vuelo non-stop pa Fort Lauderdale

Ayera tardi Aeropuerto Internacional Reina Beatrix a ricibi e vuelo inaugural entre Fort Lauderdale ...

Director ATIA evento refineria Br 1.JPG

ATIA ta mira Citgo Aruba y Refineria di Aruba como un oportunidad nobo pa mas progreso pa nos isla

Diabierna anochi, ATIA a tene su evento anual na Aruba Marriott  Resort & Stellaris ...

Instancianan social ta exigi compromiso di gobierno

Den prome conferencia di prensa di gobierno di Aruba pa 2018, prome minister Evelyn ...

OM: ‘Afpakteam ta haci yamada pa paga boet of belasting atrasa’

Riba 3 di juli ultimo, un relato di prensa a wordo publica cu tabata ...

Pregunta serio riba pasado di director hotel Sero Colorado

ORANJESTAD – Recientemente gobierno a anuncia e nomber di e compania local cu tin ...