(ElNacional) – Diferente factor a influi den e resultadonan di eleccionnan di diadomingo 21 di november, den cual cu 58.2% di abstencion el chavismo a bay cu 20 di e 23 gobernacionnan. Analistanan politico ta coincidi cu falta di unidad y coordinacion den e sector opositor di e pais a evita cu por a conkista un cantidad mas halto di espacio.

“Sin duda cu e hecho cu e oposicion no tabata uni den e proceso aki ta un factor clave. Esaki ta splica dicon nan no por a logra haya por lo menos ocho gobernacion”, e politologo John Magdaleno a señala den un entrevista cu El Nacional.

Aunke e efecto di coordinacion strategico no por wordo midi den e oportunidad aki, esaki sa tin un impacto ariba e preferencianan electoral di pueblo. Magdaleno a splica cu, a base di experiencianan den otro procesonan electoral, ora cu e ciudadanonan ta wak un oposicion uni y competitivo, e procedemento y potencial di e sector politico ey ta aumenta.

Pa otro politologo, Ricardo Sucre, na Venezuela ya tin un abstencion di activistanan. Esaki kiermen cu ya no ta un reaccion di pueblo pa condicionnan determina, si no cu el a converti den un actor politico invisible cu ta influi den e resultadonan.

Sucre a coincidi cu e division tabatin un peso importante den e cifra di abstencion den e eleccionnan aki. “Na 2017 algo similar a pasa, pero e diferencia tabata cu pa e tempo ey a presenta candidatonan fuerte y solido y e abstencion no a influi mesun hopi manera den eleccionnan di e aña aki. Ora cu nos observa e cifranan di e resultadonan di eleccion, tin estadonan den cual si bo suma e resultadonan di tur e candidatonan di oposicion, e ora nan lo por a gana”, el a señala.

LEAVE A REPLY

Please enter your comment!
Please enter your name here