Diadomingo awor, dia 7 di december, ta bay celebra eleccionnan legislativo na Venezuela. Oposicion Venezolano tambe ta prepara pa esaki mediante loke nan ta yama Consulta Nacional, cu na Aruba ya caba ta existi un organisacion cu ta preparando tur e detaye pa esey tuma luga aki na nos isla.

Den e eleccion aki lo renoba e miembronan di Asamblea Nacional, cu na e momentonan aki, mayoria ta opositor. E miembronan eligi diadomingo lo cumpli un periodo for di aña 2021 te cu 2026. Te e aña aki Parlamento tabata conta cu 167 diputado, pero e presidente Nicolas Maduro, segun oposicion mes, den un intento pa kita e control di oposicion a aumenta e cantidad di diputado pa 277, un aumento di 66% di parlamentarionan.

Dia 2 di augustus di 2020 partidonan politico cu ta conforma coalicion di Mesa di Unidad Democratico a acorda pa no participa den eleccionnan parlamentario di e aña aki. Nan a informa cu nan no ta dispuesto pa participa den un eleccionnan den cual tin e posibilidad di fraude, y cu ya caba a denuncia iregularidad. Nan a haci un yamado na comunidad internacional pa desconoce e resultadonan di e proceso.

Consulta Nacional di Venezuela 2020 ta un consulta popular cu a wordo convoca pa Asamblea Nacional y gobierno interino di Juan Guaido, entre 7 y 12 di december, como un contesta y rechaso di eleccionnan parlamentario di dia 6 y lo puntra pa e votadonan si nan ta apoya “tur e mecanismo di presion nacional y internacional pa, den marco di Constitucion, realisa eleccionnan presidencial y parlamentario, liber, husto y verificabel”.

Tambe lo consulta si nan ta rechasa of no eleccionnan legislativo convoca pa dia 6 di december, “of cualkier otro fecha, mientras cu no ta existi condicionnan pa eleccionnan liber”. Oposicion a pone un fecha fiho pa eleccionnan presencial dia 12 di december, pero Venezolanonan lo por vota di manera virtual mediante un plataforma digital pa esunnan cu lo desea participa desde distancia.

Venezolanonan cu ta biba na Aruba lo por participa den e actividad aki desde e dia 7 di december te 11 di december mediante e plataforma virtual VOATZ, un plataforma sin fin di lucro cu tin e mision di haci cu e votacion no solamente ta mas accesibel y sigur, sino cu tambe mas transparente, auditable y responsabel. Sede principal di e plataforma ta na Massachusetts, Merca.

Di mesun manera, na nos isla ta existi un organisacion di comandonan pa e Consulta Popular aki cu ta conta cu coordinadonan general como Grislynn Hernandez y Tina Faria, comando strategico, gruponan di observacion y veeduria, unidad di organisacion y tecnico, ademas di grupo di comunicacion, mobilisacion y activismo.

Mariana Urbina cu ta forma parti di e ekipo di comunicacion a expresa pa Bon Dia Aruba cu Venezolanonan lo por participa na distinto punto fisico, den casonan aki negoshinan comercial desde cualkier districto e dia 12 di december, cu ta e dia di participacion presencial, presentando un ID sea paspoort of cedula Venezolano. Nan lo traha conhuntamente cu algun comercio di Aruba siguiendo tur protocol sanitario implementa pa DVG.

Urbina a expresa cu personanan cu nacionalidad Venezolano cu ta interesa di participa den e consulta aki y no tin conocemento di e plataforma VOATZ por comunica cu nan na telefon: 743.3875 of 563.3313 pa asina e persona haya un guia y por realisa e consulta, di manera sigur sin cu datonan personal lo keda exponi.

Nan lo conta cu parti logistico tambe pa por mobilisa personanan cu no tin auto of medio pa yega na un di e puntonan fisico, segun Urbina a sigura.

Tambe a wordo treci dilanti cu debi na situacion politico, social y economico cu Venezuela ta bibando na e momentonan aki ta existi un ‘desmotibacion’ di parti di votadonan cu no ta kere den e politica Venezolano, pa cu esaki Urbina a manifesta cu ora un Venezolano ta na otro pais y ta pensa riba e necesidad y dificultadnan cu su famia na Venezuela ta pasando na e momentonan aki “esey ta permiti bo pa dicidi te na unda nos por yega pa por apoya e salida di poder di actual Gobierno di Nicolas Maduro”.

“E consulta aki ta permiti mi pa manifesta mi mes den contra di e gobierno di mi pais, si nan ta bin bisa mi cu mi tin cu sali 50 biaha, 50 biaha mi ta sali pa rechasa e gobierno aki, pa apoya e atencion pa e crisis humanitario cu mi pais ta bibando aworaki y cu ta afecta henter e pais” Urbina a expresa.

Tambe, el a trece dilanti cu e obhetivo di e consulta popular ta pa haya e reconocemento na nivel mundial di e “ farsa electoral” segun loke Urbina a specifica, ademas e reconocemento cu ta comproba cu Venezolanonan no ta sigur y no ta confia den eleccionnan legislativo di 6 di december.

Di mesun manera, Bon Dia Aruba a purba di haya contacto cu Consulado Venezolano di Aruba pa haya informacion si personanan cu nacionalidad Venezolano lo por acerca te Consulado diadomingo 6 di december y vota den eleccionnan parlamentario, pero redaccion no por a haya contesta.

 

 

 

LEAVE A REPLY

Please enter your comment!
Please enter your name here