Ministro di comunicacion y informacion di Venezuela, Jorge Rodriguez, a urgi ciudadano pa mantene nan mes den cuarentena pa corta e cadena di contagio di coronavirus.

Rodriguez a anuncia cu te diasabra pasa a detecta 70 caso di COVID-19 na e pais. Ademas el a urgi e ciudadano pa mantene nan mes den cuarentena pa limita propagacion di e virus. El a sigura cu si respeta e isolacion pa por lo menos 70%, lo logra haya menos persona infecta.

“Ayera nos tabatin 27 casos. Pa un total di 70 caso diagnostica cu COVID-19. Nos tin dos caso critico den centronan priva na Caracas y Miranda,” el a expresa mientras tambe el a comunica cu tin 17 pacient cu a recupera caba.

Di otro banda el a sigura cu 100 % di e casonan di COVID-19 registra na Venezuela ta bin di exterior.

A pesar di e evidente crisis den e hospitalnan den henter e pais, Rodriguez ta garantisa cu tain suficiente cama y centro asistencial pa enfrenta e pandemia.

Pa e regimen Venezolano mecanismo social manera e Carnet de la Patria y medico comunitario ta suficiente pa enfrenta e pandemia.

“E diferencia ta cu nos ta haci diez miyon di encuesta, nos ta bishita cas, aki ni den e clinicanan priva e pacientnan tin cu paga un cen, nos ta conta cu e solidaridad di China y nos tin un pueblo organisa,” segun Rodriguez.

El a critica e medidanan tuma pa gobierno di Italia, Merca y Spaña, cu na su huicio a actua laat y e propagacion di e virus a acelera.

“Na Italia nan ta bati record di fayecido y na Spaña a tuma medida demasiado laat. Te poco dia pasa nan tabata celebrando wega. Na Merca na a tene ainda e Super Bowl a pesar di e advertencianan,” el a conclui.

LEAVE A REPLY

Please enter your comment!
Please enter your name here