E refineria Venezolano Cardon, na Punto Fijo, cu un capacidad pa procesa 310.000 bari pa dia, a stop di procesa crudo desde diaranson pasa, pa motibo di daño den algun unidad, entre nan algun destilado, segun dos empleado den contacto cu agencia Reuters ayera.
E paralisacion ta sucede na momento cu e empresa estatal Venezolano Pdvsa ta na e nivel mas abao di produccion di crudo di ultimo setenta aña.
Tambe e reservanan di combustibel ta agotando, debi na e collapse di Pdvsa, su refinerianan y su red di distribucion, ademas di e restriccionnan di importacion relaciona cu e sancionnan, segun informacion di agencia informativo Argus.
Un informe interno di Pdvsa cu fecha 13 di mei ta indica cu e inventarionan di gasolin y diesel den ocho estado na frontera ta completamente agota, y e resto di e pais tabatin e ekivalente di dos o tres dia di reserva ainda, segun Argus.
Tambe e agencia noticiero a revela cu e produccion di crudo di Venezuela a cay te alrededor di 500.000 bari pa dia (bpd), debi na e retraso den exportacion y cu e facilidadnan di almacenamento yen, loke ta obliga Pdvsa pa para produccion na e posnan, segun informacion suministra pa cuatro empleado di Pdvsa na Argus.
E caida di produccion ta mas grandi na Faha di Orinoco, unda produccion a reduci te menos di 200.000 bpd den ultimo dianan, compara cu e mas di 700.000 bpd na inicio di mei. Un aña pasa Faha di Orinoco tabata produci alrededor di 1 miyon bpd ainda.
Pdvsa no a responde riba peticion di informacion di e agencianan noticiero.
