Pronto lo por tin yamada di grupo via WhatsApp cu hasta ocho persona, segun un reporte diamars. E servicio di chat propiedad di Facebook, segun reportenan, ta lansando e caracteristica nobo na aparatonan cu e beta update mas recien di iOS y Android instala.
Participantenan cu e version mas actualisa di WhatsApp lo por participa den yamadanan di voz of video den grupo, segun WABetaInfo. Pa lansa e caracteristica, habri un grupo y tap e boton di yamada. Miembronan di grupo cu no ta warda como contacto den bo celular, segun e reporte, no lo ser agrega na e yamada.
Alternativamente, por habri e tab di yamada den WhatsApp, tap e boton di yamada, y tap ‘New Group Call’. Na e momento ey por scoge ki contactonan lo kier yama.
WABetaInfo ta bisa cu WhatsApp gradualmente ta lansando e caracteristica nobo.
Representantenan di WhatsApp y Facebook no a responde inmediatamente na un peticion di CNET pa comentario.
