Artista di tattoo Daniel Silva, kende a sali den e programa di television Mericano, ‘Ink Master’, a ser aresta pa asesinato despues di morto di e strea di YouTube, Corey La Barrie den un accidente di trafico diadomingo ultimo.
E accidente cu a termina cu bida di e influencer a tuma luga alrededor di 9:30pm diadomingo, despues cu e McLaren 600LT 2020 den cual ambos tabata circula na velocidad halto a perde control. E vehiculo a sali di caretera y impacta cu un borchi di trafico y un palo. Despues di e hecho fatal, Silva, di 27 aña di edad, a purba huy na pia, pero persona presente na e luga a impedi esaki.
Segun polis di Los Angeles, ningun otro vehiculo tabata implica den e accidente cu a termina cu bida di Corey, kende tabata biaha como pasahero. Maske a traslada e influencer rapidamente na hospital, el a perde su bida poco despues.
Segun TMZ, fuente cercano na La Barrie a declara na polis cu prome cu e accidente e amigonan tabata celebrando e cumpleaños di e YouTuber, y cu a mira Silva, e chauffeur, bebiendo alcohol algun ora prome cu e accidente.
Algun ora despues a revela cu e persona conduciendo tabata Daniel Silva, strea di e di dies temporada di ‘Ink Master’ y figura conoci riba internet. Poco despues a informa cu e responsabel tabata den custodia policial, en conexion cu e accidente fatal. Polis tambe a confirma cu Silva a purba ‘huy’ di e sitio.
Originario di Australia, Corey La Barrie tabata un YouTuber famoso cu tabata haci chansa y reto dibertido. Riba su canal di YouTube, crea na 2014, e tabatin mas di 300mil suscrito y mas di 44 miyon views.
Prome cu su morto, el a pone un serie di ‘Stories’ riba rednan social, celebrando su cumpleaños.
