Den ultimo tempo aki nos ta haya nos cu un cantidad di decision di gobierno cu supuestamente mester demostra nan decision pa tuma medida rapido y fuerte, pa pone cierto cosnan cana. Esey den tempo di crisis sigur ta na su lugar, basta nos ta papia di e temanan unda esaki ta bon. Lamentablemente, den varios caso hustamente tabata necesario pa tuma djis un tiki mas tempo pa ehecuta e cosnan aki di forma corecto.

Asina nos a bin topa cu e caso di e traspaso di Colegio San Nicolas pa e fundacion cu ta opera De Schakel, sin cu absolutamente no tabatin un preparacion di e asunto, pa busca loke na Hulandes nan ta yama ‘draagvlak’ den comunidad pa esaki. Y pakico no ta haci esaki? Nos tin e leve sospecho cu di e manera aki lo kier a evita e debate tocante e topico aki. Si esey ta e caso, for di punto di vista di goberna bon esey ta mal pensa, pasobra e debate ta bin di tur manera y ta haci e mandatario luci malo como un persona cu kier sconde cos.

No cu e no ta logra esey pero tambe e argumentonan cu e ta usa pa duna e fundacion menciona e ‘benefit of the doubt’ ta resulta di ta bastante debil. E ministro ta bisa cu e fundacion tin excelente resultado di riba 90%, y nos lo a prefera di kere su palabra,pero nos no por a comproba esaki como veridico. Den documentacion di su propio ministerio nos por a haya e resultadonan di aña escolar 2018-2019. Pa loke ta MAVO, Schakel College tabatin un porcentahe di exito den examen final di 75%, mientras otro scolnan manera Filomena College (89%) y Mon Plaisir College (88%) tabata mas halto. Nos no a menciona tur pero De Schakel tabata number penultimo den e categoria aki, unda Ceque College tabata e unico riba 90% (92%). Awor, lo bisa, nos ta compara e resultadonan di HAVO/VWO, pasobra ta esey Colegio San Nicolas ta haci.. esey ta berdad, ban compara esey anto. Aki Colegio San Nicolas ta score 67% pa e ‘regulier traject’ mientras cu De Schakel ta yega na 88%. Chapeau pa esey. By the way, Colegio Arubano aki ta score 70%, apenas mihor cu Colegio San Nicolas. Pa loke ta VWO, ta cifra di Colegio Arubano so tin… (78%).

Anto ainda nos no a haci e comparacion di cantidad di alumno, pasobra Colegio San Nicolas ta un scol di mas di 500 alumno, cu un grupo di mas di 100 alumno anualmente pa bay examen final. De Schakel tin cantidad minimo cu practicamente ta haya les individual. Na bon Hulandes: ta compara ‘appels met peren’. Riba e tipo di dato aki un mandatario ta basa su escogencia? No comprende nos malo, nos ta desea di mira mehoracion den e prestacionnan di tur scol na Aruba. Pero ora bo kier mehora, bo mester sa promer kico bo ta bay drecha pa despues sa con pa hacie. Bo ta bay duna un par di hende, cu tin nan experiencia den enseñansa, responsabilidad pa un scol cu un publico cu un background socio-economico totalmente opuesto na loke nan a haci te awor, cu tur respet pa nan empeño, pero esaki (Colegio San Nicolas) ta completamente otro ‘ballgame’.

Otro trabao den pura cu nos ta mira ta e re-inscripcion pa tereno di huur, unda ta simplemente gara tur procedimento di pasado benta afor y confronta especialmente e cunukeronan di hopi aña, cu ta pertenece na e grupo generalmente menos conoci cu computer y tur cos cu tin di haci cu comunicacion digital, pa claba nan cu poco proceso cu nan no tin ni un idea ta con esaki ta bay. Pero si nan no cumpli, nan ta perde tur nan derecho. Esaki ta parce nos no solamente un falta di consideracion, sino un falta plano di respet. Ta facil pa djis asumi cu tur hende na Aruba sa maneha nan asuntonan online y e ‘bieunan ey no mester maha’, esey en todo caso ta parce e pensamento na e ministerio y departamento concerni.

Y laga nos pensa cu ta esaki ta e idea (eroneo) cu nan tin, pa nos no haya nos den teritorio di esnan cu ta kere cu tur esaki ta un set up pa kita tereno di hende. Nos no ta saca e conclusion ey y nos ta subraya e pensamento cu e terenonan cu tin, y nan ta scars, mester ta disponible pa actividad economico, sigur den e periodo aki di crisis. Sin embargo, si esey ta asina, ta pakico nos no ta tende nada di un maneho coherente, y pereferiblemente conhunto, di e ministerionan envolvi? Kico nos ta bay haya den e tempo cu ta bin, un emision di tereno na hende cu ta mas cerca di e partidonan den coalicion, y menos escogencia a base di plan solido di negoshi? Ta masha bunita cu ta exigi business plan di e empresarionan di futuro, pero ningun caminda ta haya e criterionan di desaroyo planifica, cu ta e ‘cinta di midi’ cu cual ta midi un y tur?

Nos a comprende caba cu asina leu nos mandatarionan no a yega. “Boso mester comprende cu ta tempo di crisis. Nos ta haciendo… cos.” Sin planificacion, aparentemente.

 

LEAVE A REPLY

Please enter your comment!
Please enter your name here