Corte Comun di Husticia di Aruba, Corsou, Sint Maarten y Boneiro, Sint Eustatius y Saba (Hof) a confirma un decision anterior cu a permiti un homber transgenero Arubiano cambia su indicacion di sexo riba su acta di nacemento di femenino pa masculino. Den e sentencia, Hof a conclui cu e derecho na reconocemento legal di identidad di genero ta proteha bao di e Convencion Europeo di Derechonan Humano.

E decision, emiti dia 31 di maart 2026 y publica dia 3 di juni 2026, ta confirma e sentencia di Corte di Prome Instancia di Aruba, aunke Hof a yega na mesun resultado riba otro base legal. E caso ta ser considera uno importante pasobra e ta trata un buraco den legislacion Arubiano tocante cambio di indicacion di sexo pa personanan transgenero.

E apelacion a ser presenta pa Registro Civil di Aruba (Ambtenaar van de Burgerlijke Stand, ABS), cu a pone pregunta tocante e base legal cu a ser usa pa permiti e cambio. Mientras cu ABS no tabata opone na e peticion mes, e tabata busca clarificacion tocante con e ley mester ser interpreta den casonan similar den futuro.

E persona involucra den e caso ta un homber Arubiano cu a nace na aña 2006. Na juni 2025 el a haya aprobacion hudicial pa cambia su prome nombernan pa refleha su identidad masculino. Despues el a pidi pa cambia e indicacion di sexo riba su acta di nacemento di femenino pa masculino. Na juli 2025, Corte di Prome Instancia a aproba e peticion y a ordena e Registro Civil pa registra e cambio.

Segun e dossier, e homber a indica cu ya pa hopi tempo e ta biba y presenta su mes den sociedad como homber, y no como un persona femenino. Tambe a sali na cla cu e tabata casi na final di un trayecto medico relaciona cu su transicion di genero. Corte di Prome Instancia a constata cu tin presencia di “gender dysforia” (stress psicologico causa pa un discrepancia entre e identidad di genero di un persona y su sexo asigna ora el a nace) y a conclui cu e cambio pidi mester ser legalmente reconoci.

E apelacion tabata concentra riba e pregunta si articulo 1:24 di Codigo Civil di Aruba por sirbi como base legal pa modifica e indicacion di sexo den un acta di nacemento. E articulo aki ta trata principalmente di coreccion di erornan den registronan civil.

Den su sentencia original, Corte di Prome Instancia a fundamenta su decision parcialmente riba articulo 1:24 y riba articulo 8 di e Convencion Europeo di Derechonan Humano (EVRM), cu ta proteha e derecho na bida priva. Segun Corte, Aruba, como parti di Reino Hulandes y como hurisdiccion cu ta cay bao di e convencion, tin obligacion positivo pa crea posibilidad pa personanan transgenero logra reconocemento legal di nan identidad di genero.

Den apelacion, ABS a argumenta cu articulo 1:24 no tabata destina pa casonan cu ta involucra personanan transgenero y a pidi aclaracion for di Hof. Na mesun momento, e entidad a declara cu no tin obhecion contra reconocemento legal basa riba articulo 8 di e EVRM. ABS tampoco no a cuestiona e conclusionnan di corte inferior cu e identidad di genero di e peticionario ta genuino, permanente y sosteni pa evidencia medico-profesional.

Hof a duna rason na ABS tocante interpretacion di articulo 1:24. Den su analisis, e huesnan a referi ampliamente na un sentencia di Corte Supremo Hulandes di aña 2007. E decision ey a haci distincion entre coreccion di erornan den actanan oficial y reconocemento legal di un cambio di identidad di genero. Segun Corte Supremo, e procedemento pa corigi eror no ta destina como mecanismo general pa personanan transgenero cambia nan indicacion di sexo. Na lugar di esey, legislacion special tabata necesario pa trata e tipo di peticionnan ey.

Hof a conclui cu Corte di Prome Instancia a interpreta articulo 1:24 demasiado amplio. Segun e huesnan, e disposicion no ta ofrece base legal pa cambia sexo registra den casonan di identidad transgenero. E hurisprudencia Hulandes, segun Hof, ta indica claramente cu mester tin legislacion specifico pa regula e proceso aki.

E peticionario a argumenta cu conocemento cientifico moderno y cambionan social actual ta mustra cu identidad di genero no por ser determina exclusivamente riba caracteristicanan fisico cu ta presente na momento di nacemento. Segun su posicion, identidad di genero profundamente sinti y permanentemente biba tambe mester ser considera.

Aunke cu Hof a reconoce e desaroyonan aki, e huesnan a señala cu interpreta articulo 1:24 di e manera ey lo nifica cu e Registro Civil mester evalua cada caso pa determina si un peticion ta basa riba un identidad di genero duradero y autentico. Den ausencia di un ley cu ta establece criteria y procedemento pa e evaluacion aki, Hof a considera cu no ta apropia pa pone e responsabilidad ey riba un autoridad administrativo.

E sentencia tambe a examina e evolucion di ley na Hulanda. For di 1 di juli 2014, Hulanda tin e asina yama Ley Transgenero, cu ta permiti personanan riba 16 aña solicita cambio di indicacion di sexo riba nan acta di nacemento door di un procedemento formal. Bao di e sistema ey, un persona por declara cu su identidad di genero ta diferente di e sexo registra na momento di nacemento.

Sinembargo, Hof a enfatisa cu cambionan legislativo adopta na Hulanda no ta bira automaticamente parti di derecho Arubiano. Referiendo na hurisprudencia anterior di Corte Supremo Hulandes, e huesnan a indica cu e principio di harmonia den Reino no ta implica cu tur reforma legal Hulandes ta aplica automaticamente na Aruba. Hof a señala cu legisladornan Arubiano no a introduci un procedemento similar pa personanan transgenero, ni durante e revision amplio di Codigo Civil cu a tuma lugar na 2021.

A pesar di rechasa articulo 1:24 como base legal, Hof finalmente a determina cu e peticionario tin derecho di cambia su indicacion di sexo riba su acta di nacemento bao di articulo 8 di e Convencion Europeo di Derechonan Humano.

Segun e huesnan, identidad di genero ta forma parti di bida priva di un individuo y, pa e motibo ey, ta cay den proteccion di e convencion. Hof a recorda cu paisnan cu ta parti di e tratado por tin obligacion, den cierto circunstancianan, pa reconoce legalmente identidad di genero di personanan transgenero. Esaki ta nifica cu, den casonan specifico, un persona transgenero tin derecho pa pone e indicacion di sexo riba su acta di nacemento di acuerdo cu su identidad di genero permanentemente biba

Hof a agrega cu autoridadnan publico tin solamente un espacio limita pa tuma decision independiente den materia aki, pasobra ta trata di derechonan fundamental. Te ora Aruba adopta legislacion specifico, e huesnan a indica cu corte mester sigui evalua peticionnan individualmente, caso pa caso.

Den e evaluacion di e caso concreto, Hof a considera varios rapport y declaracion profesional. Entre nan tabatin evaluacion di psicologo, un declaracion di un pediatra y evidencia cu e peticionario a ricibi guia y sosten for di e ekipo specialisa den genero di Amsterdam UMC. Basa riba e documentacion presenta, Hof a conclui cu tabatin prueba suficiente di un identidad masculino profundamente sinti y sosteni den tempo.

Como resultado, Hof a confirma e sentencia anterior cu ta obliga Registro Civil cambia e indicacion di sexo riba e acta di nacemento di e peticionario di femenino pa masculino. Aunke e resultado final a keda mescos, e sentencia ta clarifica cu e base legal principal pa e reconocemento aki ta basa riba proteccion di derechonan humano y no riba reglanan normal pa corigi eror administrativo.

E decision ta pone enfasis riba e falta continuo di legislacion completo na Aruba tocante cambio di indicacion di sexo. Door di confirma cu corte por basa su decision directamente riba articulo 8 di EVRM, e sentencia por sirbi como guia importante pa casonan den futuro te ora legisladornan Arubiano dicidi si lo introduci un procedemento legal specifico.

Hof no a impone gastonan pa proceso legal riba ningun di e partinan y oficialmente a confirma e decision di Corte di Prome Instancia.