Parlamentario Xiomara Maduro (MEP) ta critica e falta di transparencia di Gobierno AVP-FUTURO riba e implicacionnan constitucional di Rijkswet HOFA y Landsverordening Waarborging Houdbare Overheidsfinanciën (LWHO).

Segun Maduro, Gobierno ta enfoca casi exclusivamente riba e beneficio financiero di HOFA, pero ta evita e discusion tocante e impacto constitucional cu e leynan por tin riba autonomia di Aruba.“HOFA ta mas cu solamente ‘placa barata’. E ta toca autonomia, gobernacion y e relacion constitucional entre Aruba y Reino Hulandes. Sinembargo, Pueblo no ta tende casi nada tocante e aspectonan aki for di e mandatarionan di AVP-FUTURO,” Maduro ta expresa.

Segun e parlamentario, mientras cu Minister di Finanzas, Geoffrey Wever ta papia di cifranan y beneficio financiero, e preguntanan mas importante ainda no tin contesta: te unda autonomia di Aruba ta yega, ki rol Reino lo hunga den supervision financiero y ki consecuencia e leynan aki por tin pa futuro generacionnan.

Maduro a señala cu precisamente Minister di Relacionnan di Reino, Gerlien Croes, tin e responsabilidad principal pa splica Pueblo con Gobierno ta proteha y defende autonomia di Aruba den e proceso aki. “E minister cu ta encarga cu Relacionnan di Reino mester ta e prome persona pa splica con Aruba su autonomia ta wordo garantisa. Te awor nos no a tende bisa nada riba esey. Pueblo merece sa exactamente unda Gobierno ta para y con e ta defende e interesnan constitucional di Aruba.”

Maduro tambe ta exigi cu Minister President Mike Eman ta sali publicamente pa splica si su Gobierno AVP FUTURO ta dispuesto pa acepta solamente e beneficio financiero di HOFA of si tin concesionnan constitucional cu Aruba lo mester haci como pago pa e “placa barata.” “Pueblo tin derecho di sa si Gobierno ta bay busca ‘placa barata’ a costo di nos autonomia. E pregunta fundamental ta: ki garantia tin Aruba cu nos posicion constitucional no lo wordo debilita? Esey ta un pregunta cu Mike Eman mester contesta Pueblo personalmente.”

“Si Gobierno ta convenci cu HOFA ta bon pa Aruba, e ora no tin ningun motibo pa evita e discusion constitucional. Transparencia ta nifica conta e historia completo, no solamente e parti cu ta conveniente.” Maduro ta conclui bisando: “Pueblo merece informacion completo prome cu decisionnan cu por afecta Aruba su futuro constitucional wordo tuma. Mike, Gerlien y Geoffrey no por entrega Aruba su autonomia den silencio.”

Nota di redaccion: E articulo aki ta opinion di e autor y no ta representa opinion di Bon Dia Aruba.