Ayera atardi a tuma lugar un audiencia pro forma contra e sospechoso A. Faña, kende ta ser sospecha di a mata su tanta, Luz Divina Faña, dia 2 di november 2025. Segun Ministerio Publico (OM), e sospechoso a hinca e victima cu un obheto skerpi varios biaha den su lomba y pecho.
Durante e audiencia, OM a informa cu e investigacion ainda no ta cla y cu mester di mas tempo pa finalisa diferente aspecto di e caso. Te aworaki, e sospechoso a ser interoga dos biaha, pero un di tres interogacion ta necesario y ta programa pa tuma lugar e siman binidero.
Ademas, diferente material di evidencia a ser manda pa Hulanda pa investigacion forense na Instituto Forense Hulandes (NFI). Un parti di e resultadonan a yega caba, pero ainda tin varios resultado pendiente. NFI no a indica ainda cuanto tempo lo tuma pa entrega e resultadonan cu falta.
Tambe tin tres rapport di evaluacion cu ainda ta den preparacion: un di Stichting Reclassering, un evaluacion psicologico y un evaluacion psiquiatrico. Segun OM, ta importante pa tin mas oportunidad pa papia cu e sospechoso.
OM a pidi pa programa e tratamento profundo di e caso pa dia 13 di november y a reserva henter mainta pa e proceso. Prome cu esaki, lo tin un otro audiencia pro forma dia 4 di september, unda lo duna un actualisacion tocante e progreso di e investigacion y e rapportnan di evaluacion di e sospechoso.
E abogadonan di defensa no a presenta ningun peticion adicional pa investigacion durante e audiencia.
