Segun estudio, costo di cuminda, awa, coriente y combustible entre efectonan climatico cu participantenan a sinti mas frecuente

Presion riba costo di bida ta aparece manera un di e efectonan di cambio climatico cu participantenan di un estudio nacional na Aruba ta indica cu nan a experimenta mas frecuentemente durante ultimo cinco aña. Mas cu mitar di e participantenan a menciona prijs mas halto di cuminda y aumento den gasto pa coriente, awa y combustible. E resultado ta trece otro dimension di adaptacion climatico dilanti: no solamente proteccion contra daño fisico, sino tambe capacidad di famianan pa carga cu costo creciente.

Esaki ta sali for di e estudio “Public preferences towards climate change adaptation in Aruba: a national survey”, prepara pa Institute for Environmental Studies di Vrije Universiteit Amsterdam como parti di e proceso pa desaroya Aruba su National Adaptation Strategy. E investigacion ta examina con participantenan ta percibi cambio climatico, cua efecto nan ta experimenta y cua medida di adaptacion nan ta considera importante.

Bon Dia Aruba a trata caba parti di e estudio cu ta mustra cu aumento di temperatura ta e preocupacion climatico principal entre participantenan. E siguiente resultado importante ta relaciona cu e manera cu efectonan climatico ta ser sinti den bida diario, particularmente den gasto di cas.

Ora e participantenan por a scoge hasta tres di e efectonan negativo cu nan a experimenta mas frecuentemente durante ultimo cinco aña, 57% a indica prijs mas halto di cuminda. Otro 55% a menciona aumento den gasto financiero pa coriente, awa y/of combustible. Esaki ta haci presion economico e dos efecto menciona mas frecuentemente den e encuesta.

E cifranan ta sobresali compara cu diferente efecto fisico cu normalmente ta ser asocia cu cambio climatico. Por ehempel, 34% a menciona reduccion di actividadnan pafo, 33% problema cu interupcion di coriente of suministro di energia y 25% destruccion di naturalesa riba tera of den lama.

E porcentahenan pa daño directo tabata considerablemente mas abao. Un 8% a menciona problema di salud fisico, 6% daño na propiedad y 4% gasto adicional relaciona cu prima di seguro of dificultad pa haya seguro. Solamente 1% a menciona problema cu awa limpi, 1% desplasamento debi na desaster natural y 1% perdida di balor di cas of propiedad.

E investigadornan ta señala cu esaki no ta nifica cu cada aumento den prijs di cuminda, awa, coriente of combustible por ser atribui directamente na cambio climatico. E encuesta ta registra loke participantenan mes ta identifica como efectonan cu nan a experimenta. Den su discusion di e resultado, e rapport ta indica cu costo creciente di cuminda y energia por refleha, entre otro, presion climatico riba cadena di suministro y aumento di demanda pa energia, por ehempel pa refresca espacio durante periodo di calor.

Segun investigadornan, e resultado ta mustra cu adaptacion climatico tin un dimension economico importante. Si famianan ta sinti efecto principalmente den nan gasto diario, medida di adaptacion por tin mas efecto si nan yuda reduci vulnerabilidad economico ademas di reduci riesgo fisico.

Entre e posibilidadnan cu e rapport ta menciona tin mehoracion di eficiencia den uzo di energia y awa y fortificacion di produccion di cuminda pa hacie mas resistente contra cambio climatico. E idea ta cu medidanan asina por contribui na resiliencia climatico y, na mesun momento, limita presion riba gasto.

E aspecto di energia ta aparece varios biaha den e investigacion. Den e comentarionan habri, algun participante a expresa preocupacion tocante costo halto di awa y coriente. Tambe a aparece sugerencianan pa facilita acceso na energia renobabel, particularmente pa famianan cu menos recurso financiero.

Un punto specifico menciona den e contestanan habri ta e proceso pa instala sistema solar. Un participante a señala cu tempo di espera pa inspeccion necesario por yega na aproximadamente un aña y mei. E rapport ta presenta esaki manera ehempel di un obstaculo administrativo cu por limita velocidad cu cual transicion energetico por avansa.

Den nan conclusion, e investigadornan ta señala cu por facilita acceso na energia solar door di kita obstaculonan administrativo y haci e inversion mas alcansabel pa famianan cu entrada mas abou. Entre e opcionnan menciona tin subsidio of otro forma di sosten financiero.

E cuestion di costo ta conecta directamente cu otro tema cu e estudio a investiga: con sosten pa adaptacion climatico mester ser reparti entre poblacion.

Ora e participantenan a ser puntra cua grupo mester haya prioridad pa asistencia den adaptacion, 50% a indica cu tur hende mester haya mesun nivel di sosten. Sinembargo, un parti considerable a identifica gruponan specifico cu, segun nan, mester haya atencion adicional.

Un 24% a scoge hende di edad, 20% persona cu ta biba den area cu riesgo climatico halto y 18% persona cu entrada abao. Mucha a ser scogi pa 14% di participante y personanan cu discapacidad pa 9%. Participantenan por a scoge hasta dos grupo.

E resultado ta indica cu entre participantenan tin sosten tanto pa medida general cu ta beneficia henter poblacion como pa asistencia mas dirigi na persona cu por tin mas exposicion na riesgo of menos recurso pa proteha nan mes.

Den e discusion di e estudio, e investigadornan a menciona varios posibilidad pa combina e dos enfokenan. Medida general por inclui infrastructura mas resistente y restauracion di ecosistema, mientras sosten specifico por ser dirigi na grupo cu tin mas dificultad pa financia cambio na nan cas of pa proteha nan mes contra calor y otro riesgo.

Un posibilidad presenta den e rapport ta sosten financiero pa haci cas mas resistente contra efectonan climatico. Tambe ta menciona prestamo cu interes abao, basa riba capacidad financiero di e persona, pa evita cu costo inicial halto di medida di adaptacion ta forma un obstaculo pa famianan cu entrada mas limita.

E investigadornan ta menciona como opcion cu por ser considera creacion di un National Adaptation Fund pa administra cierto forma di financiamento. Ademas, fondo chikito pa proyecto comunitario por sostene iniciativa local, manera centro pa refresca den bisindario of proyecto pa maneho di awa di yobida.

E aspecto di equidad ta sali tambe for di e comentarionan habri. Algun participante a expresa preocupacion cu costo di adaptacion, manera belasting relaciona cu transicion of aumento den tarifa di servicio basico por pone un carga mas grandi riba famianan.

Na mesun momento, den e contestanan tin e percepcion entre algun participante cu actor comercial grandi, incluyendo hotel y operador di tour, ta contribui mas na cierto presion ambiental y p’esey mester carga cu un parti mas grandi di responsabilidad financiero y ambiental.

Analisis estadistico di e encuesta ta agrega un punto importante. Entrada di cas no tabata significativamente relaciona cu si un participante a reporta aumento di prijs di cuminda of gasto adicional pa energia, awa y combustible como efecto negativo. Segun e investigadornan, esaki por indica cu e presion di costo reporta den e encuesta ta ser sinti ampliamente y no exclusivamente entre grupo cu entrada abao.

Nivel di educacion si a mustra un relacion den un di e resultadonan. Participantenan cu nivel mas halto di educacion tabata, den promedio, menos inclina pa reporta prijs mas halto di cuminda manera un efecto climatico cu nan a experimenta. Pa aumento den gasto di energia, awa y combustible, e analisis no a haya un relacion estadisticamente significativo cu educacion.

Tampoco lugar di residencia na Aruba a mustra un relacion significativo cu e efectonan economico reporta. E estudio no a haya evidencia estadistico cu participantenan di un districto specifico tabata mas of menos inclina pa reporta prijs mas halto di cuminda of gasto di energia, awa y combustible. E investigadornan ta interpreta esaki manera un indicacion cu e asunto por ser percibi manera un reto cu ta toca henter isla, en bes di un problema limita na cierto districto.

E resultado economico ta agrega un otro capa na discusion tocante adaptacion climatico na Aruba. Mientras riesgo manera calor, aumento di nivel di lama, secura y tormenta ta exigi preparacion fisico, e encuesta ta indica cu pa hopi participante e efecto cu ta mas cerca di nan realidad diario ta aparece den nan gasto.

Pa National Adaptation Strategy, e rapport ta indica cu adaptacion na cambio climatico y fortificacion di economia mester bay man den man. Medidanan pa uza awa y energia mas eficientemente, haci energia renobabel mas accesibel, fortalece produccion local di cuminda, prepara casnan miho contra riesgonan climatico y brinda sosten na gruponan vulnerabel por ser combina den un enfoke integral.

E investigadornan ta enfatisa tambe importancia di equidad. Segun e estudio, Aruba mester no solamente determina cua medida di adaptacion ta necesario, sino tambe con pa reparti e costo na un manera husto y inclui gruponan cu menos recurso financiero.